चरेस ओसारपासारको आरोपमा भारतीय पक्राउ परेपछि नरैनापुरमा झडप ! छुटाउन दबाब दिँदै प्रहरी चौकी घेराउ



प्रहरीले प्रतिबन्धित लागुऔषध चरेस ओसारपासारको आरोपमा एक जना भारतीय नागरिकलाई पक्राउ परेपछि शुक्रबार रातिसम्म बाँकेको राप्तीपारि नरैनापुर क्षेत्र तनावपूर्ण बन्यो । पक्राउ परेका भारतीय नागरिकलाई छुटाउन दबाब दिँदै प्रहरी चौकी घेराउ गरेका थिए ।

नेपालगञ्जबाट नरैनापुर पुगेर लागुऔषधविरुद्ध परिचालित प्रहरीको विशेष टोलीले भारतीय नागरिक देवीविन विश्वकर्मालाई पक्राउ गरेपछि स्थिति तनावपूर्ण बनेको थियो । पक्राउपछि भारतीय नागरिकलाई प्रहरी चौकीमा राखेका मुचुल्काका लागि गएको प्रहरी टोलीमाथि ढुङ्गामुढा गरी तनाव प्रयास भएको थियो ।

प्रहरी चौकी घेराउसँगै तोडफोड र ढुङ्गामुढा गर्न थालेपछि स्थिति नियन्त्रणमा लिन प्रहरीलाई ६५ राउण्ड हवाई फायर गर्नुपरेको बाँके प्रहरीका निमित्त प्रमुख प्रहरी नायब उपरीक्षक प्रकाश सापकोटाले जानकारी दिनुभयो । उहाँले भन्नुभयो, “त्यहाँको अवस्था अहिले नियन्त्रणमा छ । थप घटना हुन नदिन अहिले पनि सुरक्षाकर्मी परिचालन गरेका छौँ ।”

चरेशसहित पक्राउ परेका भारतीय नागरिक देवीविनलाई अबेर राति नै नेपालगञ्ज ल्याइसकिएको छ । देवीदिन पक्राउ परेपछि सीमापारिबाट आएका भारतीय युवाले उनलाई नछोडेसम्म प्रहरीलाई जान नदिने भन्दै घेरा हालेका थिए । सो क्रममा इलाका प्रहरी कार्यालय भगवानपुरको एउटा गाडी र मोटरसाइकल तोडफोड भएको छ ।

“प्रहरीको गाडीमा आगजनीको प्रयाससहित र ढुङ्गामुढा गरेपछि थप प्रहरी बल पुगेर अवस्था नियन्त्रण गर्न खोजेको थियो”, प्रहरी नायब उपरीक्षक सापकोटाले भन्नुभयो, “तर प्रहरीको उपस्थिति कमजोर देखेपछि उत्तेजित झीडले क्रमशः आत्रोश फैलाउँदै चौकीमै घेराउ गर्न पुगे । स्थितिलाई नियन्त्रणमा लिन हवाई फायर नै गर्नुपर्‍यो ।”

देवीविनलाई पक्राउ गरेपछि सीमा क्षेत्रबाट आएका भारतीय नागरिक आक्रमक भएर प्रहरीमाथि जाइलागेका थिए । उनीहरुलाई स्थानीय गाउँलेले साथ दिएपछि मुठभेडको अवस्था सिर्जना भएको थियो । जिल्लाबाट बन्दोबस्तीसहित पुगेको नेपाल प्रहरी र सशस्त्र प्रहरीको टोलीले राति १२ बजेतिर घटनास्थललाई पूर्णरुपमा नियन्त्रणमा लिएको प्रहरी नायब उपरीक्षक सापकोटाले बताउनुभयो ।

“चार सय बढी मानिसले चौकी घेराउ गरेका थिए । नेपालगञ्जबाट नेपाल प्रहरी र सशस्त्र प्रहरीको तीन वटा टोली, आसपासका चौकीबाट समेत नरैनापुरमा मद्दतका लागि पुगेका थिए भने नेपालगञ्जमा थप सुरक्षाकर्मीलाई तयारी अवस्थामा राखिएको थियो । स्थिति नियन्त्रणमा आएपछि थप बल त्यतर्फ जानुपरेन”, प्रहरी नायब उपरीक्षक सापकोटाले भन्नुभयो ।

तस्करी गरेर नेपाल ल्याउँदै गएको मालसामानसहित गत साता सशस्त्र प्रहरीले नियन्त्रणमा लिएका अपराधीलाई यसरी घेरा हाली भारतीयले छुटाएर लैजान भएका थिए । “राज्यको कमजोर उपस्थिति देखेर आज पनि तस्करलाई त्यसैगरी छुटाएर लैजाने प्रयास भयो”, प्रहरी नायब उपरीक्षक सापकोटाले भन्नुभयो, “हामीले त्यो प्रयासलाई असफल पारेका छौँ ।”

ताजा अपडेट