लाल्टिन खबर 
काठमाडौं – प्रधानमन्त्री केपी शर्मा ओलीको चीन भ्रमणका क्रममा चीनको जोड नयाँ सहमतिभन्दा पनि पहिला भएका सहमति कार्यान्यनमा देखिएको छ ।
नेपालले जारी गरेको विज्ञप्तिमा चीनले ५०० मिलियन युआन सहयोगको घोषणा गरेको उल्लेख छ । तर, संयुक्त बक्तब्यमा त्यो विषय उल्लेख छैन । चीनले दुई देशको बीचमा रणनीतिक साझेदारी गहन बनाउने इच्छा व्यक्त गरेको छ ।
टोखा छहरे सुरुङ मार्गको सम्भावयता अध्ययन थाल्न दुवै मुलुक सहमत भए । केरुङ-काठमाडौं रेलमार्गको सम्भाव्यता अध्ययन गर्न तदारुकता देखाउने दुई देश सहमत देखिएका छन् । यसका साथै रेलसम्बन्धी वार्ता र सहयोग आदान प्रदान निरन्तर रूपमा हुने पनि उल्लेख गरिएको छ ।
नेपालमा धेरै चासोका साथ हेरिएको पोखरा विमानस्थलको विषय भने कही कतै देखिएन । २२० केभी प्रसारण लाइनको सम्भाव्यता अध्ययनलाई अगाडि बढाउने विषय भने उल्लेख गरिएको छ ।
नेपाली पक्षले मदन भण्डारी विश्वविद्यालय, दमकमा स्टेडियम र डडेलधुरामा सिटी कम्प्लेक्स लगायतका काम अगाडि बढाइनदिन चीनलाई आग्रह गरेको छ । झापा प्रधानमन्त्रीको गृहजिल्ला हो भने डडेलधुरामा सत्तासाझेदार प्रमुख दल कांग्रेस सभापति शेरबहादुर देउवाको गृहजिल्ला हो।
दुई देशबीच नेपाल-चीन औधोगिक पार्कको काम अगाडि बढाउने सहमति भएको छ ।
त्यस्तै, पोखरा र लुम्बिनीलाई लक्षित गरेर विभिन्न कार्यक्रम गर्ने, चीनले नेपाल भ्रमण वर्षमा वभिन्न सहयोग गर्ने विषय पनि समेटिएको छ । नेपालले चीनको जीडीआईलाई समर्थन गर्ने उल्लेख गरिए पनि जीएसआईको बारेमा केही बोलिएन ।
भ्रमणका क्रममा नेपाल र चीनबीच नौ वटा सहमति भएका छन् । आर्थिक र प्राविधिक सहयोगसम्बन्धी, टोखा छहरे सुरुङमार्ग निर्माण, भैसीको मासु चीन निर्यात गर्ने, विकास योजना २०२४-२९ सम्बन्धी सहयोगमा दुई देश सहमत भए ।
त्यस्तै केही नगद रकम दिने, चिनियाँ भाषा शिक्षक सम्बन्धी, नेपाल टेलिभिजन र चीन मिडिया ग्रुपबीच सहमति भएको छ।
