काठमाडौँ – प्रधानमन्त्री पुष्पकमल दाहालले बालकुमारीमा दुई युवाको मृत्यु र मन्त्रीको गाडी जलाइएको प्रकरण लोकतन्त्र र गणतन्त्रविरुद्धको डिजाइन भएको बताएका छन्।
सोमबार नेपाली कांग्रेसले मेलमिलाप दिवसको अवसरमा आयोजना गरेको अन्तर्क्रियामा बोल्दै प्रधानमन्त्री दाहालले बालकुमारी घटना लोकतन्त्र र गणतन्त्रविरुद्धको डिजाइनको रुपमा भएको आफूले अनुमान गरेको बताएका हुन्।
उनले आफूले सम्बन्धित निकायसँग घटनाबारे ब्रिफिङ लिँदा सामान्य नलागेको दाबी गरे। उनले सो घटना बाहिर देखिएजस्तो मात्रै नभएको बताए। घटनाको अन्तर्यमा अरु नै केही कुरा भएको उनको भनाइ छ।
उनले मृतकका परिवारलाई रोजगारी दिने र सहिद घोषणा गर्ने कुरा राजनीतिक तहमा छलफल भइरहेको पनि बताए। उनले जनतालाई निराशा बाँडिएको भन्दै देशमा अध्याँरोबाहेक केही नदेखाउनेहरु राष्ट्रवादी हुन नसक्ने बताए।
