![](https://laltinkhabar.com/wp-content/uploads/2024/01/IMG-20240113-WA0003.jpg)
काठमाडौँ – नेकपा (माओवादी केन्द्र) ले पार्टीको विधान सम्मेलनका लागि प्रस्ताव तयार पार्ने जिम्मेवारी पार्टी पदाधिकारीहरुलाई दिएको छ।
शुक्रबार र शनिबार २ दिन पार्टी केन्द्रीय कार्यालय पेरिसडाँडामा बसेको पार्टी स्थायी समिति बैठकले आगामी फागुन १, २ र ३ गते बोलाइको सम्मेलनमा प्रस्तुत गर्ने प्रस्तावलाई अन्तिम रुप दिने जिम्मेवारी पार्टी पदाधिकारी बैठकलाई दिएको हो।
बैठकमा नेताहरुबीच पार्टीको केन्द्रीय समिति १५१ सदस्य रहने प्रस्तावमा सहमति भएको पनि पार्टी प्रवक्ता अग्निप्रसाद सापकोटाले जानकारी दिए।
बैठकमा नेताहरुले पार्टीलाई विधि र विधानअनुसार अघि बढाउन पनि पार्टी नेतृत्वको ध्यानाकर्षण गराएका थिए। उनीहरुले पार्टीलाई चुस्तदुरुस्त राख्ने कुरामा पनि जोड दिनुपर्ने आवश्यकता औंल्याएको पनि प्रवक्ता सापकोटाले बताए।
उनले भने, ‘खासगरी केन्द्रीय समितिको बारेमा चाहिँ सबैको एकमतजस्तो भयो। १५१ जनाको प्रस्ताव भएको छ। त्यो ठीक छ भन्ने भयो। अब स्थायी समिति बैठक हिजो र आज जुन लक्ष्यका साथ बोलाइएको थियो, त्यो लक्ष्य पूरा भएको छ। बैठक निकै राम्रो भएको छ। भोलिबाट केन्द्रीय समिति छ। त्यसमा पार्टीको अभियानको समीक्षा हुन्छ। र विधान सम्मेलन १, २ र ३ मा हुन्छ। आएका सबै सुझावहरुलाई संकेन्द्रण गरेर पदाधिकारीले एक गतेदेखि सुरु हुने विधान सम्मेलनमा प्रस्तुत गर्ने भन्ने निर्णय भएको छ आज।’