लाल्टिन खबर 
काठमाडौं । सहकारी ठगी प्रकरण छानबिनका लागि बन्ने संसदीय समितिको कार्यादेश टुंगो लगाउन कार्यदलको बैठक अहिले बसिरहेको छ। कानून, न्याय तथा संसदीय मामिला मन्त्रालय सिंहदरबारमा अहिले बैठक जारी छ।
कार्यदलमा कानूनमन्त्री पदम गिरी, एमाले प्रमुख सचेतक बर्तौला, कांग्रेस सहमहामन्त्री जीवन परियार र रास्वपा सांसद शिशिर खनाल छन्।
बैठकले संसदीय समितिको टीओआर तयार पार्ने कार्यदल सदस्य तथा एमाले संसदीय दलका प्रमुख सचेतक महेश बर्तौलाले बताए।
सत्तारुढ दल र प्रतिपक्षी दलबीच शनिबार दिउँसो भएको पटक-पटकको छलफलपछि संसदीय छानबिन समिति बनाउने सहमति जुटेको थियो। तर समिति कस्तो बन्ने, जिम्मेवारी के-के हुने जस्ता विषयमा सहमति भइसकेको छैन।
समितिको टीओआर कार्यदलले तयार पारेपछि मात्रै बाँकी कुरा भन्न सकिने कांग्रेस संसदीय दलका प्रमुख सचेतक रमेश लेखकले बताए।
शनिबार दलहरुबीच भएको सहमतिमा लामिछानेको नाम राख्ने वा नराख्ने विषयमा सहमति भएको छैन। कांग्रेसले सहकारी ठगी प्रकरणमा उपप्रधान तथा गृहमन्त्री संलग्न रहेको भन्दै संसदीय छानबिन समितिको माग गर्दै संसद अवरुद्ध पार्दै आएको छ। तर, समिति बनाउने सहमति भएपछि आजबाट सदनको गतिरोध अन्त्य हुने भएको छ।
