लाल्टिन खबर 
काठमाडौं । नेपाली कांग्रेसले महामन्त्री गगन थापा लक्षित देशको सूचना बेचेको भन्दै उपप्रधान तथा गृहमन्त्री रवि लामिछानेले लगाएको आरोप पुष्टि नगरे राजीनामा माग्ने भएको छ।
आइतबार गृहमन्त्री लामिछानेले प्रतिनिधि सभा बैठकमा देशको सूचना बेच्ने देशको मन्त्री होस् कि पार्टीको महामन्त्री सबैलाई कारबाहीको दायरामा ल्याउनुपर्नेु भनेका थिए।
गृहमन्त्री लामिछानेका यी भनाइ अराजनीतिक, गैरजिम्मेवार, आपत्तिजनक र निन्दनीय भएको भन्दै कांग्रेसले कि यो आरोप प्रमाणित गर्न कि गृहमन्त्री हटाउन माग गर्ने भएको छ।
सोमबार कान्तिपुर टेलिभिजनको ुफायरसाइडु कार्यक्रममा बोल्दै कांग्रेस नेता कृष्ण सिटौलाले गृहमन्त्री लामिछानेका भनाइ कि प्रमाणित गर्न, कि उनलाई पदबाट हटाउन प्रधानमन्त्रीलाई कांग्रेसले माग गर्ने बताएका हुन्।
उनले भनेका छन्- गृहमन्त्रीको राजीनामाबारे हामी प्रधानमन्त्रीसँग कुरा गर्छौं। हाम्रो प्रश्न प्रधानमन्त्रीसँग छ। के सरकारले कांग्रेसलाई हेर्ने दृष्टिकोण यही हो? हामी चुनौती दिएर भन्न चाहन्छौं, कि यसलाई प्रमाणित गर कि गृहमन्त्री हटाऊ। के कांग्रेस सूचना बेच्ने हो? प्रधानमन्त्रीले देशलाई कता लैजान खोजेको होरु हामी गृहमन्त्री जान्दैनौं अब। उहाँ (गृहमन्त्री) ले सोची, सम्झी, लिखित रूपमा आरोप लगाउनुभएको छ। उहाँले कांग्रेसमाथि यस्तो संघीन आरोप लगाउने आधार कहाँबाट पाउनुभयो।
आज आएर गृहमन्त्रीले यस्तो भन्नु खेदपूर्ण रहेको पनि उनले बताए।
उनले थप भने- कहाँ उभिएर बोल्दै हुनुहुन्छ उहाँ। मजाकमा केटाकेटी खेले जस्तो बोल्नुभएको छ। यसले गम्भीर मोड लिन्छ। हामीले संसदीय दलबाट सोमबार निर्णय गरिसकेका छौं। पर्सि कार्य समितिबाट निर्णय गर्छौं। गृहमन्त्री लामिछानेले जुन आरोप कांग्रेस र कांग्रेस साथीहरूमाथि सांकेतिक रूपमा लगाउनुभएको छ, हामी चुनौती दिन्छौं, त्यो प्रमाणित गरेर देखाउनुस्।
लामिछानेले गृहमन्त्री पदको दुरूपयोग गरेको भन्दै सिटौलाले उनका अभिव्यक्ति गलत, झुटा, असत्य र भ्रामक भएको बताएका छन्।
उनले भने- पञ्चायतमा पनि कुनै कम्युनिस्ट, कांग्रेसविरूद्ध गृहमन्त्रीहरू यसरी प्रस्तुत भएका थिएनन्। राजा महेन्द्रले कांग्रेसमाथि यति ठूलो आरोप लगाउन सकेनन्। राजा ज्ञानेन्द्रका पालामा गृहमन्त्री कमल थापाले पनि यस्तो संघीन आरोप लगाएर कहिल्यै बोलेनन्। यस्तो उत्तेजित र हिंस्रक आरोप लाएनन्।
