काठमाडौं– सहकारी ठगी प्रकरणमा संसदीय छानबिन समिति गठनको कार्यादेश तय गर्न बालुवाटारमा बसेको बैठक निष्कर्षविहीन भएको छ ।
प्रधानमन्त्रीसहित सत्तापक्षका शीर्ष नेताहरुसँगको छलफलमा कांग्रेस लचिलो भएर प्रस्तुत भएको सहमहामन्त्री तथा कार्यदल सदस्य जीवन परियारले जानकारी दिए ।
‘सेफ ल्यान्डिङ गरेर जाऔँ । भोलि संसदमा बजेट प्रस्तुत गर्ने दिन छ, यस कारणले आज साँझसम्म टुंग्याउँ भनेर हामी अलि लचिलो भएर अगाडि बढेका छौँ,’ बालुवाटारबाट बाहिरिने क्रममा उनले सञ्चारकर्मीहरुसँग भने ।
‘प्रधानमन्त्रीज्यूले दुबैतर्फको राय लिनुभएको छ । हामीले भनेको कुराहरु सत्तापक्षसँग राख्दै हुनुहुन्छ । उताबाट आएको कुरा हामीसँग राख्नुहुन्छ,’ परियारले भने, ‘प्रधानमन्त्रीज्यूले सत्ता पक्षसँग बसेर धारणा बनाउँछौँ, साँझसम्म बसेर अन्तिम टुंगोमा पु¥याउँछौँ भन्नुभएको छ ।’
सत्तारुढ दलका शीर्ष नेताहरूसँग कुरा नमिलेपछि कांग्रेसले दिउँसो १ बजे पदाधिकारी र पूर्वपदाधिकारीसँग छलफल गर्ने भएको छ । अहिले सत्तापक्ष नेताहरु बालुवाटारमा छलफल गरिरहेका छन्।
