लाल्टिन खबर काठमाडौं । संयुक्त सरकारले प्रस्तुत गरेको बजेटप्रति सत्ता साझेदार नेकपा एमालेका सांसदहरूको स्वर प्रमुख प्रतिपक्षी दल नेपाली कांग्रेसका सांसदसँग मिल्दै गएको देखिएको छ। त्यसलाई नेकपा माओवादी केन्द्रका नेताहरूले सहज रूपमा लिएको पाइँदैन।
एमाले अध्यक्ष केपी शर्मा ओलीले असन्तुष्टि जनाएको बजेटलाई लिएर मङ्गलवारको संसद् बैठकमा उनकै पार्टीका सांसदहरूले चर्को आलोचना गरेपछि त्यो चर्चाको विषय बन्न पुगेको हो।
ओलीको अभिव्यक्तिपछि प्रधानमन्त्री पुष्पकमल दाहाल प्रचण्डले उनीसँग छलफल गरेका थिए। त्यसपछि फेरि उनीनिकट सांसदहरूको मुखबाट असन्तुष्टि पोखिनुलाई अर्थपूर्ण मानिएको हो।
त्यसले नेकपा माओवादी केन्द्रलाई कति सशङ्कित बनाएको छ?
“उहाँहरूले किन त्यसरी बोलिरहनु भएको छ तर हामी सशङ्कित त छैनौँ”, कतै समस्या र त्रुटि भए शीर्षस्थ तहमा छलफल गरेर हल गर्न सकिने उल्लेख गर्दै माओवादी नेता देवेन्द्र पौडेलले भने, “तर सधैँ असन्तुष्टि पोख्दै, आफ्नै सरकारको आलोचना गर्दै हिँडेर त कहाँ पुगिएला र?”
‘सङ्कट आए माओवादीकै कारण’
संसद् बैठकमा बजेटको आलोचना गर्नेमा सांसद सूर्य थापा एक थिए। उनले सत्ता, समीकरण, सरकार, पक्ष र प्रतिपक्ष परिवर्तनशील भएको मात्र बताएनन् बजेटले समीकरण परिवर्तनको औचित्यसिद्ध गर्न नसकेको आरोप पनि लगाए।
“समग्रमा जनतामा आशा जगाउन सक्नु भएको छैन भने, समीकरण बदलिएर के हुँदो रहेछ र?”, थापाले संसद्मा प्रश्न गरेका छन्।
सुरुमा अध्यक्ष ओली र त्यसपछि उनीनिकट नेताको असन्तुष्टि कतै सत्ता समीकरणमै सङ्कट उत्पन्न गर्ने खालको एमालेको असन्तुष्टि त होइन?
थापाले आफ्नो अभिव्यक्तिबारे भने: “हाम्रो कारणले सत्तामा खतरा छैन, तर माओवादीको व्यवहारले सङ्कट आउन सक्छ, त्यो त म स्पष्ट भन्छु।”
उनले बजेटमा राखिएको ‘जनयुद्ध’ शब्दको आलोचना मात्र गरेनन् पञ्चायतकालमा मारिएका कांग्रेस कार्यकर्ताबारे केही उल्लेख नगरिएको भन्दै त्यसलाई पक्षपातपूर्ण व्यवहारको संज्ञा दिए।
प्रधानमन्त्रीमाथि दबाव बढाउने उद्देश्य
बजेटको चर्को आलोचना गर्नेमा एमाले अध्यक्ष ओलीनिकट अर्का सांसद हुन् गोकुल बास्कोटा। उनले बजेटबारे छलफल गर्न खोज्दा अर्थमन्त्रीसँग भेट्न र कुरा गर्न नपाएको सुनाए।
“बजेट त बन्द हुन्छ नै तर मन्त्रालयको ढोका पनि बन्द भयो, दुष्मननै त होइन होला हामी, गजब गजब देखियो”, बजेटप्रति असन्तुष्टि जनाउने क्रममा नेता बास्कोटाले भने, “एउटा पार्टीको जस्तो छ सत्ता समीकरणको जस्तो छनक छैन, तीतो भए तीतो होस् सत्य यही हो।”
प्रमुख प्रतिपक्षी दल नेपाली कांग्रेसले कतिपय मन्त्रालय अन्तर्गतका विनियोजित शीर्षकहरू पुनर्लेखन गर्नुपर्ने धारणा राखेको छ।
बास्कोटाले पनि भनेका छन्, “अलिकति सच्याऔँ, अलिकति पुनर्विचार गरौँ, अलिकति बदलौँ।”
माओवादी नेताहरूले एमाले नेताहरूको असन्तुष्टिलाई समीकरण नै फेर्ने भन्दा पनि प्रधानमन्त्रीमाथि दबाव बढाउने उद्देश्यको रूपमा हेरेको पाइन्छ।
“नियुक्तदेखि लिएर कतिपय कुराहरूमा आफ्नो प्रभाव, हैसियत र उपस्थितिको निम्ति गरिएको दबावको रूपमा मैले बुझेको छु”, माओवादी नेता देवेन्द्र पौडेलले भने, “तर जो प्रधानमन्त्री हुँदा पनि आवश्यकताभन्दा बढी दबाव दिनु सुहाउने कुरा होइन।”
उनले प्रधानमन्त्री एमाले अध्यक्षसँग नियमित छलफलमा रहेको बताउँदै एमालेको असन्तुष्टि सरकार फेर्ने हदसम्मको नरहेको विश्वास व्यक्त गरे। बीबीसी
