काठमाडौँ । नेकपा एकीकृत समाजवादीका सांसद प्रेम आलेले अर्थ मन्त्रालयको तार काट्ने मुसा पशुपतिनाथ तिर छिरेको भन्दै व्यङ्ग कसेका छन् ।
बिहीबार प्रतिनिधिसभा बैठकमा आफ्नो धारणा राख्दै सांसद आलेले पशुपतिनाथमा भएको अनियमितताको छानबिन गर्ने समितिका संयोजक देवी बराललाई हटाएर पर्यटन मन्त्रीले पुरस्कृत गरेको आरोप लगाए ।
बिहीबार प्रतिनिधि सभाको बैठकमा आकस्मिक समयमा बोल्दै सांसद आलेले पशुपतिनाथ मन्दिरको घ्याम्पे दानपेटिका चोरी गर्ने कोषका पदाधिकारीलाई विभागीय मन्त्रीले संरक्षण गरेको आरोप लगाएका हुन् ।
उनले भने, ‘मूर्ति तथा बहुमूल्य सामग्री चोरिएको छ सभामुख महोदय, कोषको अध्यक्ष, मन्त्री, पदाधिकारी मस्त निद्रामा छन् । गोठाटारको ५ सय ३५ रोपनी जग्गामध्ये ५ सय ४ रोपनी मात्र हालसाबिक गरेर ३१ रोपनी जग्गा बिचौलियाहरूको मिलेमतोमा अपचलन गरी त्यही अपचलनमा मुछिएकालाई कोषको सदस्यमा नियुक्ति दिइएको छ । गोठाटारको सार्वजनिक जग्गा हडपेको विरोध गर्ने कोषका सदस्यहरू विश्वकरण जैन, पूर्णबहादुर जेठारालाई पदबाट हटाउनका लागि यही जेठ २५ गते स्पष्टीकरण सोधिएको छ ।’
उनले भने ‘ गत वर्ष अर्थ मन्त्रालयमा तार काट्ने मुसा यसपटक पशुपतिनाथमा छिरेको छ । पहिलो पटक २०७९ माघ १४ गते तार काटियो, पशुपति क्षेत्र विकास कोषका सदस्यको संयोजकत्वमा छानबिन समिति गठन भयो । प्रतिवेदनले सत्य तथ्य पत्ता लगायो । तर पर्यटन मन्त्रीले तार काट्ने मुरालाई नसमातेर उल्टै छानबिन समितिका संयोजक देवी बराललाई पुरस्कार स्वरूप सदस्यबाट हटाइयो ।
यस्तै सांसद आलेले नेपाल बायुसेवा निगम महालेखा परीक्षकको रिर्पोट अनुसार नेपाल वायुसेवा निगमको घाटा १ अर्ब ७० करोड रहेको र ऋण ५० अर्ब नाघिसकेको बताउँदै ३ महिनामा निगमले ४ अर्ब नाफा कमायो भनेर पर्यटनमन्त्रीले संचार ध्यममा झुट बोलेको बताए । उनले यसरी जनतालाई भ्रम छर्न नपाइने बताउँदै सदनमार्फत स्पष्ट पार्न माग गरे ।
