लाल्टिन खबर 
जनकपुरधाम : अर्थसहित ४ मन्त्रालय पाएपछि नेपाली कांग्रेस मधेश सरकारमा सहभागी हुने भएको छ।
कांग्रेस सांसद सुनिल यादव अर्थमन्त्री बन्ने तय भएको छ भने जनार्दन सिंह क्षेत्री भूमि व्यवस्था, कृषि तथा सहकारीमन्त्री, शेषनारायण यादव ऊर्जा, सिँचाइ तथा खानेपानीमन्त्री र कौशलकिशोर राय श्रम तथा यातायातमन्त्रीको जिम्मेवारी पाउने तय भएको छ।
मुख्यमन्त्री सतिशकुमार सिंहले अर्थ मन्त्रालय आफ्नो पार्टीले राख्ने अडान राखेपछि कांग्रेस सरकारमा सहभागी हुन अनिच्छुक थियो।
हिजोमात्र कांग्रेस मधेश प्रदेशका प्रमुख सचेतक कुमरकान्त झाले मधेश सरकारलाई दिएको समर्थन फिर्ता लिने चेतावनी दिएका थिए।
मन्त्रालय बाँडफाँडमा प्रदेशमा सहमति नजुट्दा केन्द्रमै नेताहरूले अर्थ मन्त्रालय कांग्रेसलाई दिने सहमति गरेको स्रोतले जनाएको छ।
कांग्रेस केन्द्रीय समितिबाटै ४ जनालाई मन्त्रीमा नियुक्त गर्न मुख्यमन्त्रीसमक्ष पत्र आएको छ। जुन पत्रमा मन्त्रालय पनि तोकिएको छ।
मुख्यमन्त्रीले आजै साँझ ५ बजे कांग्रेसका मन्त्री नियुक्त गर्ने तयारी गरेका छन्।
