लाल्टिन खबर 
काठमाडौं – अमेरिकाको मानसास पार्कबाट बेपत्ता भएकी नेपाली नर्स ममता काफ्लेलाई श्रीमानले नै हत्या गरेर शव लुकाएको प्रहरीले अभियोग लगाएको छ ।
बिहीबार स्थानीय प्रहरीले घरमा खानतलासी गरेर ममताका श्रीमान नरेश भट्टलाई पक्राउ गरेको थियो । भट्टले नै श्रीमतीको हत्या गरेर शव लुकाएको प्रहरीले औपचारिक अभियोग लगाएको स्थानीय संचारमाध्यमले बताएका छन् ।
२८ वर्षीया ममता काफ्ले भट्ट अन्तिम पटक जुलाई ३१ मा देखिएकी थिइन् । प्रहरी प्रमुख मारियो लुगोले सुरुमा नरेशलाई उनको बेपत्तामा हात रहेको र अनुसन्धानमा प्रहरीलाई सहयोग नगरेको बताएका थिए ।
यो दम्पतीकी १ वर्षीया छोरीलाई घरबाट छुट्टै लगेर समाज सेवा विभागको संरक्षणमा राखिएको छ ।
ममता हराएको रिपोर्ट श्रीमान भट्टले एकसातापछि अगष्ट ६ तारिखमा मात्रै गरेका थिए । नरेशलाई आज शुक्रबार अदालतमा पेस गर्ने प्रहरीले जनाएको छ ।
