लाल्टिन खबर 
सर्लाही – सर्लाहीमा भारतीय सिमानाको छेउमा रहेको मधुबनी गाउँको एउटा सुनसान घर बाहिरबाट हेर्दा सधैँको जस्तै शान्त थियो । प्रहरीको टोलीले त्यही घरभित्र लुकाएर राखिएको रहस्यमयी घटना सार्वजनिक गरेको छ ।
शनिबार राति, प्रहरीलाई एक गोप्य सूचना प्राप्त भयो— एउटा बोरिङ राख्न बनाइएको खाली घरमा केही अनौठो घटना भइरहेको छ ।
काठमाडौँका सौगात थापा मगर र विजय लामा, ललितपुरका सन्जय राना मगर, भक्तपुरका अमिर खत्री, भारतका सुबोध कुमार र राजिव ठाकुर थिए । सर्लाही र रौतहटका जनार्धन सिंह र विशाल राई गरी आठजना पक्राउ परे । सबै मिलेर नक्कली नोट बनाउन जुरमुराएका रहेछन् ।
प्रहरीले त्यहाँबाट १४ थान एक हजारको नोट साइजमा काटिएको कागज बरामद गर्याे । विभिन्न रङ्गको आठ लिटर केमिकल, ९५ हजार ८०५ नेपाली रुपियाँ समेत भेटिएको छ । १० थान मोबाइल सेट, एउटा नेपाली स्कारपियो गाडी र दुईवटा भारतीय मोटरसाइकल पनि बरामद भएको छ ।
पक्राउ परेका ८ जनाविरुद्ध सर्लाही जिल्ला अदालतबाट १० दिनको म्याद थप गरेर अहिले अनुसन्धान भइरहेको छ । एसपी रवीन्द्र बहादुर सिंहको भनाइ अनुसार, ‘उनीहरूले कसरी नक्कली नोट तयार गर्थे, हामी अनुसन्धान गर्दैछौँ ।’
