लाल्टिन खबर 
काठमाडौं- शिक्षा, विज्ञान तथा प्रविधिमन्त्री विद्या भट्टराईले अभिभावकको प्रतिबद्धता आएपछिमात्रै रसिया जाने विद्यार्थीलाई अध्ययन अनुमति पत्र दिइने बताएकी छन् ।
बिहीबार सिंहदरबारमा अध्ययनका लागि रसिया जाने तयारीमा रहेका विद्यार्थी र अभिभावकसँग छलफल गर्दै मन्त्री भट्टराईले युद्ध भइरहेकाले अभिभावकको प्रतिबद्धता आएपछि मात्रै अध्ययन अनुमति पत्र दिइने बताइन् ।
सरकारकै छात्रवृत्तिमा जान लागेका विद्यार्थीलाई अध्ययन अनुमति पत्र दिन मन्त्रालयले अभिभावकको प्रतिवद्धता मागेको हो ।
उनले विद्यार्थीले पाएको अवसरलाई सरकारले अनुमति दिने भन्दै त्यसअघि अभिभावक र विद्यार्थीसँग छलफल गरिएको जानकार दिइन् ।
अभिभावकले समेत विदेशमा पढिसकेपछि स्वदेश फर्कनका लागि पहल गर्नुपर्ने उनले बताएकी छन् ।
अध्ययन अनुमति पत्र लिएर पढ्न गएका विद्यार्थीको सम्बन्धित देशका राजदूतावासमार्फत आवश्यक रेकर्ड राख्ने उनले बताइन् ।
छलफलमा सहभागी विद्यार्थी तथा अभिभावकले पढ्न जान लागेका स्थानमा जोखिम नरहेकाले अध्ययन अनुमति पत्र दिन आग्रह गरेका थिए ।
मन्त्रालयका अनुसार रसियामा चिकित्सा शिक्षा, इन्जिनियरिङ, सूचना प्रविधि लगायत क्षेत्रमा पढ्न ४० जना विद्यार्थीले छात्रवृति पाएका थिए ।
अहिले पनि रसियामा हजार भन्दा धेरै नेपाली युक्रेनविरुद्धको युद्धमा सहभागी छन् । पढ्न गएका केही विद्यार्थी पनि युद्धमा सहभागी भएको सूचना आएपछि सरकार सचेत भएको हो ।
