लाल्टिन खबर 
काठमाडौँ – अर्घाखाँची, सिन्धुली र सिन्धुपाल्चोक जिल्लामा प्रमुख जिल्ला अधिकारी (सिडिओ) छैनन् । तीन जिल्ला तीन सातादेखि प्रमुख जिल्ला अधिकारीविहीन भएका हुन् ।
प्रमुख जिल्ला अधिकारी नहुँदा निमित्तले चलाएका छन् । गत ३१ साउनमा मन्त्रिपरिषद् बैठकले सिन्धुलीका प्रमुख जिल्ला अधिकारी भरत खनाललाई परराष्ट्र मन्त्रालयमा सरुवा गर्यो । १३ भदौको मन्त्रिपरिषद् बैठकले खनाललाई चीनको ग्वान्झाओस्थित महावाणिज्यदूतावासका लागि महावाणिज्यदूत नियुक्तिका लागि सिफारिस गरिसकेको छ । त्यसयता सिन्धुली प्रमुख जिल्ला अधिकारीविहीन छ । कृष्णमणि फुँयालले सिन्धुलीको निमित्त प्रमुख जिल्ला अधिकारीको रूपमा काम गरिरहेका छन् ।
सोही मितिमा अर्घाखाँचीका प्रमुख जिल्ला अधिकारी सूर्यबहादुर खत्रीलाई श्रम, रोजगार तथा सामाजिक सुरक्षा मन्त्रालयमा सरुवा गरियो । उनी मन्त्रालय अन्तर्गतको वैदेशिक रोजगार विभागमा हाजिर भइसकेका छन् । उनको सरुवापछि अर्घाखाँचीमा अहिले मेघनाथ पाध्या निमित्त प्रमुख जिल्ला अधिकारी छन् ।
यसै गरी सिन्धुपाल्चोकका प्रमुख जिल्ला अधिकारी भूपेन्द्र थापाको बाग्मती प्रदेशको मुख्यमन्त्री तथा मन्त्रिपरिषद् कार्यालयमा सरुवा भएको छ । उनको सरुवापछि जीतबहादुर भण्डारी निमित्त प्रमुख जिल्ला अधिकारीका रूपमा छन् । तर, जिल्ला प्रशासन कार्यालयको वेबसाइटमा भने भूपेन्द्र थापा नै प्रमुख जिल्ला अधिकारीका रूपमा रहेका छन् । थापाले रमाना नलिएका कारण वेबसाइटबाट नहटाएको प्रशासन कार्यालय स्रोतले जानकारी दियो । थापा भदौ ३ देखि बिदामा छन् ।
राजनीतिक सहमति र शक्ति सन्तुलन मिलाउन खोज्दा सरुवा भएको तीन सातासम्म पनि गृहले नयाँ प्रमुख जिल्ला अधिकारी खटाउन नसकेको हो । प्रमुख जिल्ला अधिकारी नहुँदा कतिपय फैसला रोकिने कर्मचारीहरू बताउँछन् । अर्कोतर्फ चाडबाडको मुखमा प्रमुख जिल्ला अधिकारी नहुँदा शान्ति सुरक्षामा पनि असर पर्न सक्ने देखिन्छ ।
