लाल्टिन खबर 
काठमाडौं- नयाँ नेतृत्वलाई लिएर नेकपा माओवादी केन्द्रनिकट विद्यार्थी संगठन अखिल क्रान्तिकारीमा विवाद बढ्दै गएको छ ।
काठमाडौंको कीर्तिपुरमा जारी राष्ट्रिय सम्मेलनको बन्दसत्रमा उमेरहदको विषयलाई लिएर क्रान्तिकारी फरक फरक समूहबीच हानाहान भएको हो ।
अखिल क्रान्तिकारीमा नयाँ नेतृत्वका लागि दीपेश पुन, पवन कार्की र नरेश रेग्मीसहितका विद्यार्थी नेताहरू दौडमा छन् ।
यस्तोमा उनीहरूलाई माओवादीका कुनै न कुनै पदाधिकारीले साथ दिएका छन् । गुटगत विवाद बढ्दै जाँदा क्रान्तिकारीको सम्मेलनस्थल कीर्तिपुरमा उमेर हदको विषयलाई लिएर दुई समूहबीच कुटाकुट भएको हो ।
सार्वजनिक भएको एउटा भिडियोमा दुई समूहबीच घम्साघम्सी चलिरहेको छ। सुरक्षाका लागि तैनाथ प्रहरीले छुटाउन खोजे पनि ठूलो भिडबीचको घम्साघम्सी मिलाउन मुस्लिक परेको देख्न सकिन्छ । भिडबाट बाहिरका विद्यार्थी हान्, हान्, हान् भनिरहेको भिडियोमा सुन्न सकिन्छ ।
सम्मेलन उद्घाटनका क्रममा माओवादी अध्यक्ष पुष्पकमल दाहाल प्रचण्डले विद्यार्थी नेताहरूलाई उमेरहदबारे बताएका थिए । उनले खुमलटारमै नेताहरूलाई डाकेर २८, ३० र ३२ वर्षे उमेरहदको विकल्पमा मतदानबाट निर्णय गर्न भनेका थिए ।
प्रचण्डले उमेर हदबन्दी लगाउने-नलगाउने निर्णय मतदानमार्फत टुंग्याउन भनेपछि सम्मेलन उद्घाटन गरेर बन्दसत्र थालिएको थियो ।
बन्दसत्रमा उमेरहदबारे मतदान गर्ने-नगर्ने विषयमा छलफ चलिरहेका बेला दुई गुटबीच बढेको विवादले कुर्सी हानाहान र ठेलाठेल भएको हो ।
आइतबार पनि यसबारे विवाद भएको थियो । एउटा पक्षले उमेरहद लगाउन मागसहित सम्मेलनस्थलमा नाराबाजी गरे । तर अर्को गुटका विद्यार्थी उमेरहदको विवक्षमा उभिँदा तनाव भएको थियो ।
