काठमाडौं, ७ कार्तिक – चालु आर्थिक वर्ष २०८१/८२ को पहिलो त्रैमासको वित्तीय विवरण २० वटै वाणिज्य बैंकले सार्वजनिक गरेका छन् । बुधबार सार्वजनिक पहिलो त्रैमासको वित्तीय विवरणअनुसार २० वाणिज्य बैंकले १६ अर्ब २३ करोड १८ लाख रुपैयाँ नाफा आर्जन गरेका छन् ।
गत आर्थिक वर्षको सोही अवधिमा वाणिज्य बैंकले १३ अर्ब ३४ करोड ४८ लाख रुपैयाँ नाफा आर्जन गरेका थिए । गत वर्षको तुलनामा बैंकहरूको नाफा औसतमा २१.६३ प्रतिशतले वृद्धि भएको हो ।
चालु वर्षको तीन महिनामा सबैभन्दा बढी नाफा भने नबिल बैंकले गरेको छ । यो बैंकले चालु आर्थिक वर्षको तीन महिनामा दुई अर्ब पाँच करोड रुपैयाँ नाफा आर्जन गरेको छ । गत वर्षको सोही अवधिमा भने यो बैंकले एक अर्ब ४६ करोड ९३ लाख रुपैयाँ नाफा आर्जन गरेको थियो ।
ग्लोबल आइएमई बैंकले एक अर्ब ५१ करोड २१ लाख रुपैयाँ नाफा आर्जन गरेको छ । नेपाल इन्भेष्टमेन्ट मेगा बैंकले एक अर्ब ४६ करोड ४० लाख रुपैयाँ नाफा आर्जन गरेको छ ।
सातवटा वाणिज्य बैंकको नाफा घटेको छ । नाफा घट्नेमा नेपाल इन्भेष्टमेन्ट मेगा, माछापुच्छ्रे, सिटिजन्स बैंक, सानिमा, हिमालयन, राष्ट्रिय वाणिज्य र एनआईसी एशिया बैंक छन् । गत वर्षको तीन महिनाको अवधिमा ८८ करोड घाटामा भएको कृषि विकास बैंकले भने यो वर्षको तीन महिनामा १९ करोड नौ लाख रुपैयाँ नाफा आर्जन गरेको छ ।
