लाल्टिन खबर 
काठमाडौँ – वैदेशिक रोजगार बोर्डका कार्यकारी निर्देशक डा. द्वारिका प्रसाद उप्रेतीमाथि गम्भीर घुस काण्डको आरोप लागेपछि श्रम, रोजगार तथा सामाजिक सुरक्षा मन्त्रालयले उनलाई छानबिनको लागि मन्त्रालयमा तानेको छ। डेनमार्कको श्रम संयोजक बनाइदिने आश्वासन दिएर एक व्यक्तिसँग २० लाख रुपैयाँ घुस लिएको आरोपसहित उजुरी परेको छ, जसका आधारमा मन्त्रालयले छानबिन समिति गठन गरेको हो।
उप्रेतीमाथि परेका उजुरीका आधारमा कानुन उपसचिव शारदा राउतको नेतृत्वमा छानबिन समिति गठन गरिएको हो । डेनमार्कको लागि अवैतनिक श्रम दूत बनाउने भन्दै आफूसँग २० लाख रुपैयाँ लिएको तर नबनाएपछि रसिदसहित प्रधानमन्त्री कार्यालयमा परेको उजुरीमाथि छानबिन गर्न समिति गठन गरिएको मन्त्रालय उच्च स्रोतले प्रशासनलाई जानकारी दिएको छ । प्रधानमन्त्री तथा मन्त्रिपरिषद्को कार्यालयले पनि प्रमाण स्वरूप रसिदसमेत पेश भएको उजुरीमाथि छानबिन गर्न श्रम मन्त्रालयलाई पत्रसहित नै पठाई सकिएको र छानबिन चलिरहेको भन्ने जवाफ आएको प्रधानमन्त्री तथा मन्त्रिपरिषद् कार्यालय स्रोतले जानकारी दिएका छन् । उप्रेतीमाथि अख्तियार दुरुपयोग अनुसन्धान आयोगले अनुसन्धान गरिरहेको बताइएको छ ।
डेनमार्कमा अवैतनिक श्रम दूत बनाइदिने प्रलोभन मात्र नभई, उप्रेतीमाथि बोर्डमा आफ्नो निकट व्यक्तिलाई अधिकृत स्तरको कर्मचारी नियुक्त गर्न निजी ल्यापटप प्रयोग गरी परीक्षा दिन लगाएको आरोपसमेत लागेको थियो । वैदेशिक रोजगार बोर्डले स्वीस हेल्भेटास (सामी परियोजना)को सहयोगमा ५ जना अधिकृत नियुक्त गर्दा अपारदर्शी ढंगले छनोट परीक्षा चलाएको तथा आफन्तलाई समेत नियुक्ति दिलाएको विषय बाहिर आएको थियो ।
श्रम मन्त्रालयका एक अधिकारीका अनुसार, उप्रेतीको नेतृत्वमा बोर्डको कार्यसम्पादन पटक–पटक विवादमा पर्दै आएको थियो। पछिल्लो घटनाले थप प्रश्न उठाएको छ।
उप्रेतीले वार्षिक समीक्षा गोष्ठी जस्तो महत्त्वपूर्ण कार्यक्रमहरूमा जानकारी बिना नै अनुपस्थित भएको, मन्त्रालयले दिएको निर्देशन अवज्ञा गर्ने गरेको तथा बोर्डको जिम्मेवारीसमेत पुरा गर्न नसकेको भन्दै मन्त्रालयले स्पष्टीकरण सोधेको थियो, जसको जवाफ उप्रेतीले आज बुझाएका छन् ।
