माओवादी र रास्वपाको आन्दोलनलाई लक्षित गर्दै प्रधानमन्त्री ओलीको प्रश्न : खुर्सानी चपायो भने पिरो हुँदैन ?

काठमाडौँ, ११ कार्तिक – प्रधानमन्त्री केपी शर्मा ओलीले दुई–चार जना अराजक तत्वहरू सडकमा उफ्रँदैमा नेपालमा ‘डेमोक्रेसी’ खत्तम नहुने चेतावनी दिएका छन् । आज (आइतबार) ‘पूर्व सुरक्षाकर्मीहरूको भूमिका’ विषयक विचार गोष्ठीलाई सम्बोधन गर्दै प्रधानमन्त्री ओलीले लोकतन्त्र त्यति सजिलै प्राप्त नभएको भन्दै कोही उफ्रँदैमा डेमोक्रेसी खत्तम नहुने दावी गरे ।

‘म भन्दिन चाहन्छु, दुई–चार अराजक तत्वहरू सडकमा उफ्रिएर नेपालमा डेमोक्रेसी खत्तम हुँदैन । हुन दिइने छैन’, प्रधानमन्त्रीले भने । उनले जरुरी पर्दा राजनीति के हो र देशका लागि राजनीति कस्तो हो र कसरी बचाउनु पर्छ भन्ने बुझेको पनि बताएका छन् ।

कसैले हतियार चलाउन बिर्सेका छैनौँ भन्दैमा आत्तिनु नपर्ने भन्दै प्रधानमन्त्रीले दुई–चार हजारको जुलुस निस्कँदैमा भरे भोलि नै गयो सरकार भनेर प्रचार भएकोमा आक्रोश पोखे । प्रधानमन्त्री ओलीले माओवादी र रास्वपाको आन्दोलनलाई लक्षित गर्दै भने, ‘खाने बेलामा आँखा नदेख्ने अनि अहिले अरूलाई गाली गर्ने । अन्याय भो भन्ने । फेरि न्याय दिने काम त मेरो होइन । खुर्सानी चपायो भने पिरो हुँदैन ?’

उनले सरकारले कसैलाई पनि अन्याय गर र गिरफ्तार गर नभन्ने बताए । ‘निष्पक्षताबाट सरकार पछि हट्दैन । दुई–चार जना कराएर न्यायालय प्रभावित पार्छु भन्ने ठानेको छ भने मैले विश्वास लिएको छु त्यस्ता हा..हु..बाट प्रभावित हुन थाल्यो भने नेपालमा न्यायको सम्भावना नै हुँदैन’, प्रधानमन्त्रीले थपे, ‘मैले हिजो अदालतमाथि आक्रमण गर्दै बोलेको सुने ।’

उनले हिजो आफूले सहकारीबारे समिति नबनाऊ भन्दा उनीहरुले नै बनाउनुप र्छ भनेर जोड गरेको भन्दै सर्वसम्मत समितिले सिफारिस गरेको विषयमा सडकमा उफ्रनु गलत अभ्यास रहेको बताए । उनले भवितव्यमा राजनीतिमा आएकाहरूले त्यस्तो व्यवहार देखाएको भन्दै वर्तमान सरकार सहमतिअनुसार अघि बढ्ने दाबी गरे । प्रधानमन्त्री ओलीले माओवादीले धक्क्याएर खान वाहेक केहि नजानेको समेत आरोप लगाएका छन् ।