लाल्टिन खबर 
काठमाडौं, १२ कार्तिक – नेकपा एमालेका सांसद रघुजी पन्तले दुई करोड भोट नै ल्याए पनि भ्रष्टाचार र ठगीको मुद्दामा पक्राउ गरेर अनुसन्धान हुनु पर्ने बताएका छन् ।
सोमबार बसेको संसदको राज्यव्यवस्था तथा सुशासन समितिको बैठकमा राष्ट्रिय स्वतन्त्र पार्टीकी सांसद डा. चन्दा कार्की भण्डारीले संसद्को चौथो ठूलो दलको सभापति रवि लामिछाने पक्राउ पर्दा जनता सडकमा आउनु स्वभाविक भएको बताएपछि पन्तले यस्तो जवाफ दिएका हुन् ।
‘रास्वपाले न्यायालयलाई प्रभावित गर्न खोजेको होइन । १२ लाख नेपालीले पत्याएको दलको शुभचिन्तक भेला भएर चिन्तन गर्नु सामान्य हो’, उनले भनिन्, ‘रवि लामिछानेको मुद्दा अझैसम्म अदालतमा पुगेको छैन । प्रहरीमा मात्रै पुगेको हो । हाम्रो आन्दोलनमा गलत मनसाय छैन ।’
सांसद भण्डारीले १२ लाख भोट ल्याएको दाबी गरेपछि एमाले सांसद पन्तले १२ लाख त के २ करोड भोट ल्याए पनि भ्रष्टाचार मुद्दामा पक्राउ र छानबिन गर्न सकिने भन्दै जवाफ दिए ।
‘कसैले दुई करोड मत नै किन नल्याओस् ? कुनै पनि व्यक्तिलाई बिनान्यायिक अनुमति थुनिराख्नु गैरन्यायिक कुरा हो , ’ उनले भने ।
त्यसअघि बैठकमा कांग्रेस सांसद सरिता प्रसाईंले पनि भण्डारीलाई चुनौती दिँदै रविलाई सरकारले भ्रष्टारी नभनेको बताइन् । ‘कानुन त सबैलाई लाग्नुपर्यो नि ! सरकारले रवि लामिछानेलाई भ्रष्टाचारी भनेको छैन । कानुनभन्दा माथि कोही छैन, पर्खिनुपर्छ’, उनले भनिन् ।
सांसद प्रसाईंले यसअघि पनि उच्चपदस्थ राजनीतिक व्यक्ति पक्राउ पर्दा कसैले सडकमा आन्दोलन नगरेको र राज्यलाई गाली नगरेको बताइन् ।
‘उनले मुख छोडेर हिँडेको पनि देखेका छैनौँ । यसअघि पक्राउ पर्दा त कोही-कसैले सडकमा आन्दोलन गरेनन् । सरकारलाई गाली गर्दै हिँडेनन्’, उनले भनिन् ।
सहकारी ठगीको आरोपमा पूर्व गृहमन्त्री लामिछाने १२ दिनदेखि कास्की प्रहरीको हिरासतमा छन् ।
पोखराको सूर्यदर्शन सहकारी, बुटवलको सुप्रिम सहकारी, चितवनको सहारा, पर्साको सानोपाइल र काठमाडौंको स्वर्णलक्ष्मी सहकारीबाट रकम लगेर गोर्खा मिडियाको ग्यालेक्सी टेलिभिजनमा लगाएको आरोप रविमाथि छ ।
रवि पक्राउ परेपछि रास्वपा नेता-कार्यकर्ताले राजनीतिक प्रतिशोध साँध्न पक्राउ गरिएको दाबीसहित पोखरा र काठमाडौंको सडक तताइरहेका छन् ।
