काठमाडौँ । गैरआवासीय नेपाली संघ (एनआरएनए) ले सामाजिक सुरक्षा कोषमा समाहित भएका श्रमिकको हकहितका लागि स्थापना गरिएको सामाजिक सुरक्षा कोषमा नेपाल सरकारसँग सहकार्य गरेको छ । एनआरएनए अध्यक्ष कुल आचार्यले संघले तत्कालै एक करोड रुपैयाँ माजिक सुरक्षा कोषमा राख्ने जानकारी दिए । ओमनको राजधानी मस्कटमा सम्पन्न संघको ८ औँ मध्यपूर्व क्षेत्रीय सम्मेलनका क्रममा अध्यक्ष आचार्यले सामाजिक सुरक्षा कोषको कार्यान्वयनमा सरकारले लिएको अभियानलाई साथ दिन आफूहरुले पनि सहकार्य गरेको बताए ।
नेपाली दूतावास ओमनमा आयोजित कार्यक्रमका बीच आचार्यले १ करोड रुपैयाँ सामाजिक सुरक्षा कोषमा राख्ने घोषणा गरेपछि संघको तारिफ भएको छ । आचार्यले नेपाल सरकारका उपप्रधानमन्त्री पूर्णबहादुर खड्का, श्रममन्त्री शरदसिंह भण्डारीसहित विशिष्ट व्यक्ति उपस्थित कार्यक्रममा भने, ‘सामाजिक सुरक्षा कोषमा समाहित भएका श्रमिकहरुका हकहितका लागि स्थापना गरिएको सामाजिक सुरक्षा कोषमा नेपाल सरकारसँग सहकार्य गर्दै गैरआवासीय नेपाली संघले तत्कालै रु एक करोडको राशी सामाजिक सुरक्षाकोष राख्ने प्रतिवद्धता जाहेर गर्दछ ।’
सामाजिक सुरक्षा कोषमा आकर्षण बढिरहेका बेला एनआरएनएले पनि विदेशमा रहेका नेपालीलाई सो अभियानमा जोड्ने माहोल बनाउनका लागि यो सहयोग अर्थपूर्ण रहेको बताइएको छ । वैदेशिक रोजगारीमा रहेकाहरु लाखौँ सामाजिक सुरक्षा कोषमा आबद्ध भइसकेका छन् । मध्यपूर्वमा कार्यरत श्रमिकहरु सामाजिक सुरक्षा कोषको दायरामा आउने क्रम बढिरहेको संघका उपाध्यक्ष आरके शर्माले जानकारी दिए । मध्यपूर्व सम्मेलनका क्रममा श्रमिकका समस्या र उनीहरुका हितका साथै सरकारलाई जोड्ने पुलका रुपमा आठौँ क्षेत्रीय सम्मेलन फलदायी भएको बताए ।
