लाल्टिन खबर 
पर्सा। मधेस प्रदेशका मुख्यमन्त्री सतिशकुमार सिंहले वीरगञ्ज क्रिकेट मैदानको मुआब्जा सम्बन्धी विवाद छिट्टै टुंगो लगाउने बताएका छन्।
नारायणी रंगशाला परिसरमा रहेको उक्त मैदान निरीक्षण गर्दै आज उनले वर्षौंदेखिको मुआब्जा विवाद आफ्नै कार्यकालभित्र टुंगो लगाउने प्रतिबद्धता जनाएका हुन्।
‘आजै म काठमाडौं जाँदैछु, संघीय युवा तथा खेलकुदमन्त्रीसँग भेटेरै मुआब्जा विवाद सम्बन्धी फाइल अर्थ मन्त्रालय पठाउन आवश्यक पहलकदमी गर्नेछु’, उनले भने, ‘राज्यको न्यून लगानीको बाबजुद पनि खेलाडीले मेहनत गरिरहनुभएको छ। खेलाडीको प्रोत्साहनका लागि प्रदेश सरकारले पनि हातेमालो गरेर अघि बढ्न चाहान्छ।’
उनले प्रदेश सरकारसँग सीमित स्रोतसाधन भएकाले पर्याप्त बजेट विनियोजन गर्न नसकेको बताए। ‘प्रदेश सरकारले क्रिकेट मैदानका लागि थोरै बजेट विनियोजन गरेको छ। सो बजेट पर्याप्त छैन। यद्यपि आगामी आवको बजेटमा थप गर्नेछौँ’, उनले भने।
क्रिकेट संघ पर्साका अध्यक्ष मनिष सिंहले मुआब्जा विवादका कारण क्रिकेट मैदानलाई तारजालीले घेराबेरा गर्न समेत नसकेको गुनासो गरे। ‘करिब चार कट्ठा जग्गाको मुआब्जा विवाद टुंगो नलाग्दा मैदान संरक्षणको काम गर्न समस्या भइरहेको छ’, उनले भने, ‘हालसालै वीरगञ्ज क्रिकेट मैदानको ‘पिच’लाई स्तरोन्नति गरी खेल्न मिल्ने बनाइसकेका छौँ।’रासस
