लाल्टिन खबर 
पोखरा- गण्डकी प्रदेश सभा सदस्य विमला गौचनको निधन भएको छ । डेंगु भएपछि गौचनको उपचारको क्रममा निधन भएको हो ।
६३ वर्षीया उनको बुधबार राती १ बजेर ४५ मिनेटमा काठमाडौंस्थित ग्रान्डी अस्पतालमा उपचारको क्रममा मृत्यु भएको हो ।
गएको शुक्रबार डेंगुको लक्षण देखिएपछि उनलाई ग्रिनसिटी हस्पिटल लगिएको थियो । इर्मेजेन्सीमा उपचारपश्चात सोहीदिन काठमाडौंको घरमा ल्याइयो ।
शुक्रबार डेंगीले च्यापेपछि उनलाई फेरी ग्रिनसिटी नै पुर्याइयो । ग्रिनसिटीबाट त्यही दिन ग्रान्डी लगेको पारिवारिक स्रोतले जनाएको छ ।
उनी नेपाली कांग्रेसको तर्फबाट समानुपातिक सांसद भएकी हुन् । २०१८ मंसिर १८ गते मुस्ताङको थसाङ गाउँपालिकामा जन्मिएकी गौचन नेपाली कांग्रेसको महाधिवेशन प्रतिनिधिसमेत हुन् ।
उनी पर्यटन व्यवसायीसमेत थिइन् ।
गौचनका एक छोरा र छोरी छन् । छोरा अमेरिकामा रहेकाले उनी फर्किएपछि दाहसंस्कार गरिनेछ । म्याग्दीमै ल्याएर दाहसंस्कार गर्ने परिवारको तयारी छ ।
