लाल्टिन खबर 
काठमाडौं, ११ मंसिर – मेडिकल व्यवसायी दुर्गा प्रसाईंलाई मंगलबार सर्वोच्च अदालतमा उपस्थित गराइए पनि बयान लिइएन । उनका छोरा निराजनले यही मंसिर ८ गते दायर गरेको बन्दीप्रत्यक्षीकरणको रिटमा न्यायाधीश डा. मनोज शर्माको इजलासले गएको आइतबार बन्दी उपस्थित गराउने आदेश जारी गरेको थियो ।
आदेशानुसार उपस्थित गराइएका प्रसाईंको बयान भने नभएको वरिष्ठ अधिवक्ता डा. सुरेन्द्र भण्डारीले बाह्रखरीलाई जानकारी दिए । उनका अनुसार, सम्भवतः बुधबार (भोलि) पेसी राखिने र बयान पनि हुनेछ । उनलाई आज प्रहरी हिरासतमै फर्काइनेछ ।
उनी यसअघि राष्ट्रिय स्वतन्त्र पार्टी (रास्वपा)की नेतृमाथि व्यक्तिगत आरोपका कारण विद्युतीय कारोबार ऐन उल्लंघनकै कसुरमा पक्राउ परी धरौटीमा रिहा भएका थिए ।
यसपटक प्रसाईंलाई सर्वोच्चबाट हुने आदेश जिल्ला अदालतमा थुनछेक आदेशको आधार बन्न सक्छ । सर्वोच्चको बयानमा उनले प्रस्तुत गरेका तथ्यका आधार दिन नसके सर्वोच्चले बन्दीप्रत्यक्षीकरणको रिट जारी गर्ने छैन । रिट जारी नभए उनी थुनामै रहनेछन् । आधार प्रस्तुत गरेको अवस्थामा भने उनी सर्वोच्चकै आदेशमा रिहा हुनेछन् ।
