काठमाडौँ — राष्ट्रिय परीक्षा बोर्डले माध्यमिक शिक्षा परीक्षा (एसईई) को नतिजा प्रकाशनका लागि बिहीबार दिउँसो १ बजे बोर्डको बैठक डाकेको छ । बुधबार नै नतिजा प्रकाशनको तयारीका लागि बोर्डको बैठक बोलाए पनि त्रुटि सुधारका लागि बैठक बिहीबारका लागि सारिएको थियो ।
परीक्षा नियन्त्रक विष्णुनारायण श्रेष्ठले एसईईको नतिजा प्रकाशनको अन्तिम चरणमा पुगेको जानकारी दिए । सकेसम्म बिहीबार साँझ नै नभए शुक्रबारसम्म नतिजा आइसक्ने उनले बताए ।
गत चैत १७ गतेदेखि सञ्चालित परीक्षामा ४ लाख ८५ हजार ३ सय ९६ विद्यार्थी सहभागी थिए । यसअघि सोमबार बसेको बोर्ड बैठकले गत वर्षकै निर्णयको आधारमा यसपालि पनि पुरानै निर्देशिकाअनुसार नतिजा प्रकाशन गर्ने निष्कर्ष निकालेको छ ।
