लाल्टिन खबर 
काठमाडौं, २८ मंसिर – नेपाल प्रिमियर लिग (एनपीएल)–२०२४ को आफ्नो अन्तिम खेलमा पनि लुम्बिनी लायन्सले हार व्यहोरेको छ । शुक्रबार भएको खेलमा कर्णाली याक्ससँग लुम्बिनी पाँच रनले पराजित भएको हो ।
योसँगै लुम्बिनीले प्रतियोगिताका सात खेलमा एक जित र ६ हारको नतिजासहित आफ्नो यात्रा टुंग्याएको छ ।
शुक्रबार कीर्तिपुरस्थित त्रिवि क्रिकेट मैदानमा सम्पन्न खेलमा कर्णालीले प्रस्तुत गरेको १२९ रनको लक्ष्य पछ्याउने क्रममा लुम्बिनीले निर्धारित २० ओभरमा सात विकेट गुमाएर १२३ रनमात्र बनाउन सक्यो ।
लुम्बिनीका टम मुरेसले सर्वाधिक ३६ रन बनाए पनि टिमको हार टार्न सकेनन् । उनले ३५ बलमा चार चौका र एक छक्का प्रहार गरे । ४०–३ को स्थितिबाट मुरेसले पाँचौँ विकेटका निम्ति सन्दीप जोरासँग ५१ रनको साझेदारी गर्दै लुम्बिनीको इनिङ सम्हालेका थिए ।
सन्दीपले २१ बलमा दुई छक्कासहित २४ रन थपे । ओपनर आशुतोष घिरैयाले २१ बलमा दुई चौकासहित १६ रन बनाए । अर्जुन साउदले ६ बलमा तीन चौका प्रहार गर्दै १३ रन जोडे । कप्तान रोहितकुमार पौडेल व्यक्तिगत १० रनमा पभेलियन फर्किनुअघि आठ बलमा दुई चौका प्रहार गरे ।
कर्णालीका जिसान मक्सुदले दुई विकेट लिए । कप्तान सोमपाल कामी, नन्दन यादव, विपीन शर्मा र विलियम बोसिस्टोको नाममा समान एक विकेट रह्यो ।
त्यसअघि, टस हारेर ब्याटिङमा आएको कर्णालीले निर्धारित २० ओभरमा आठ विकेट गुमाएर १२८ रनको योगफल खडा गरेको थियो ।
कर्णालीबाट विलियम बोसिस्टोले सर्वाधिक ४४ रन बनाए । उनले ३० बलमा तीन चौका र तीन छक्का प्रहार गरे । अर्जुन घर्तीले २५ बलमा दुई चौका र एक छक्कासहित २५ रन बनाए ।
४७–४ को स्थितिबाट यी दुईले पाँचौँ विकेटका निम्ति ७२ रनको साझेदारी गर्दै कर्णालीलाई सम्मानजनक योगफलसम्म पुर्याएका थिए ।
ओपनर बाबर हायातले २२ बलमा एक चौका र एक छक्कासहित २० रन थपे । चान्डिविक वाल्टनले १५ बलमा एक छक्कासहित १३ रन बनाए ।
यसबाहेक, कर्णालीका अन्य ब्याटरले दोहोरो अंकमा रन जोड्न सकेनन् ।
लुम्बिनीका विकाश अग्रीले तीन विकेट लिए । दुई ओभर बलिङ गरेका अग्रीले १४ रनमात्र खर्चिए । तिलक भण्डारीले दुई विकेट लिए । यस्तै, रेमोन सिमोन्ड्स, साद बिन जफर र रोहितकुमार पौडेलले समान एक विकेट लिए ।
लिगका सुरुआती दुई खेलमा हार व्यहोरे पनि कर्णालीले त्यसपछिका तीन खेलमा भने लगातार जित निकालेको थियो । कर्णाली पहिलो खेलमा जनकपुर बोल्ट्ससँग आठ विकेट र दोस्रो खेलमा काठमाडौं गुर्खाजविरुद्ध तीन विकेटले पराजित भएको थियो ।
त्यसपछि कर्णालीले तेस्रो खेलमा चितवन राइनोजविरुद्ध ६ विकेट, चौथो खेलमा विराटनगर किंग्सविरुद्ध सात रन र पाँचौँ खेलमा पोखरा एभेन्जर्सविरुद्ध सात विकेटको जित निकालेको थियो ।
लुम्बिनीले भने सात खेलबाट दुई अंक जोड्दै प्रतियोगिताको अन्त्य गरेको छ ।
लुम्बिनीले प्रतियोगिताको सुरुआती चार खेलमा लगातार हार व्यहोरेको थियो । रोहितकुमार पौडेलको कप्तानीमा रहेको टोलीले पहिलो खेलमा विराटनगर किंग्सविरुद्ध दुई विकेट, दोस्रो खेलमा पोखरा एभेन्जर्सविरुद्ध १० विकेट, तेस्रो खेलमा सुदूरपश्चिम रोयल्सविरुद्ध ४५ रन र चौथो खेलमा जनकपुर बोल्ट्ससँग एक रनको हार व्यहोरेको थियो ।
पाँचौँ खेलमा चितवन राइनोजविरुद्ध ३३ रनको जित निकाले पनि छैटौँ खेलमा लुम्बिनीले काठमाडौं गुर्खाजसँग १८ रनको हार व्यहोरेको थियो ।
