लाल्टिन खबर 
नवलपरासी, २९ मंसिर – उपप्रधानमन्त्री एवम् सहरी विकास मन्त्री प्रकाशमान सिंहले अहिलेको आवश्यकता सिपयुक्त शिक्षा भएको बताएका छन् । शनिवार कावासोतीमा रहेको श्री शिव माध्यमिक विद्यालयको स्वर्ण महोत्सव समारोहमा सम्बोधन गर्दै उनले सो कुरा बताएका हुन् । उनले अब विद्यालयहरूले शैक्षिक सर्टिफिकेटसँगै सिपको सर्टिफिकेट पनि दिन सक्नुपर्ने बताए।
‘शैक्षिक गुणस्तर सँगसँगै समयको मागबमोजिम सक्षम नागरिक बनाउनका लागि सिप सिकाउन लाग्यौँ भने राम्रो हुन्छ,’ उपप्रधानमन्त्री सिंहले भने, ‘विद्यालय तहको शिक्षा गुणस्तरीय बनाउन सक्यौँ भने देशको दिशालाई सकारात्मक बाटोमा लैजान सक्छौँ । यसमा सबैभन्दा बढी जोड दिनुपर्छ ।’
सो क्रममा उनले पार्टीलाई बलियो बनाउन पार्टी सङ्गठन विधि र नियमअनुसार चलाउनुपर्ने बताए। सिंहले पार्टीभित्र मतभेद भए पनि कांग्रेसको नीति, विचार, सिद्धान्तलाई जनतामा पुर्याउनका लागि कांग्रेसलाई केन्द्रमा राखेर सोच्न आग्रह गरे। आदर्शको कुरा गरेर नहुने भन्दै उनले सङ्गठनभित्र समस्याको पहिचान गरी व्यवहारिक भएर समाधान खोज्नुपर्नेमा जोड दिए ।
सङ्गठनकै बलमा पार्टीबाट वडा सदस्य देखि मन्त्रीसम्म जनप्रतिनिधि बनेको भन्दै उनले जनप्रतिनिधिहरूले पनि सङ्गठनमा ध्यान दिनुपर्ने बताए । उनले नमुना सदरमुकामको विषयमा आफूले सहरी विकास मन्त्रालयको नेतृत्व लिएपछि काम अघि बढाइरहेको पनि जानकारी गराए ।
