लाल्टिन खबर 
काठमाडौँ – आइतवार सहकारी ठगी, संगठित अपराध र सम्पत्ति शुद्धिकरण कसूरमा कास्की जिल्ला अदालतमा मुद्दा दर्ता भए पनि राष्ट्रिय स्वतन्त्र पार्टी (रास्वपा) सभापति रवि लामिछानेविरुद्धको मुद्दामा आजदेखि थुनछेक बहस सुरु हुुँदैछ।
अदालतमा बहस नसकिउन्जेलसम्म हिरासतमै रहनेछन् । लामिछानेसहित सूर्यदर्शन सहकारीको रकम ठगी प्रकरणमा थुनामा रहेका ५ जना प्रतिवादी थुनछेक बहस नसकिउञ्जेलसम्म लामिछाने कास्की प्रहरीकै न्यायिक हिरासतमा रहनेछन्।
सोमवार मुद्दा गोला प्रथामा गएपछि न्यायाधीशको बेन्च तोकिनेछ। त्यसपछि दुवै पक्षको बहस‚ प्रतिबहस र आदेश नहुञ्जेलसम्म रवि कास्की प्रहरीको हिरासतमै रहनेछन्।
अदालतका अनुसार आइतवार अबेर मुद्दा दर्ता प्रक्रिया सकिएकाले सोमवार थुनछेक बहस शुरु हुनेछ। यसअघि जिल्ला अदालत कास्कीले सातौँ पटक प्रहरीलाई शुक्रवारसम्म मात्र हिरासतमा राखेर अनुसन्धान गर्न म्याद दिएको थियो।
कात्तिक २ गते काठमाडौँबाट पक्राउ गरिएका लामिछानेलाई विभिन्न ठाउँका सहकारी ठगी प्रकरणमा बयानका लागि लगिए पनि बयान सकिएपछि कास्कीमै राखिएको थियो।
