लाल्टिन खबर 
काठमाडौं, २५ पुस – श्रम, रोजगार तथा सामाजिक सुरक्षामन्त्री शरतसिंह भण्डारीले दक्षिण कोरिया जान परीक्षा उत्तीर्ण गरी रोस्टरमा रहेका सबै नेपालीलाई लैजान कोरियाली राजदूतसँग आग्रह गरेका छन् ।
बिहीबार नेपालका लागि कोरियाली राजदूत पार्क ताई योङसँग भेट गर्र्दै उनले कोरिया जान सबै चरण पूरा गरी उडान पर्खाइमा रहेका कामदारलाई छिटो, सरल र सहज ढंगबाट लैजान आग्रह गरेको मन्त्रालयले जनाएको छ ।
‘दक्षिण कोरिया जानका लागि परीक्षा उत्तीर्ण गरी रोस्टरमा रहेका सबै नेपालीलाई पठाउनका लागि आगामी दिनमा श्रमिकको माग संख्या बढाउनका लागि पहल गर्नुपर्ने देखिएको छ,’ उनले राजदूतसमक्ष भने, ‘कोरिया भाषा परीक्षा उत्तीर्ण गरेका, तयारीमा रहेका, विगतमा रोस्टरमा नाम परेका तर कोरिया जान नपाएका व्यक्तिहरु समेतलाई लक्षित गरी विशेष व्यवस्था गर्नुपर्ने अवस्था छ । यसका लागि सीप विकासमा कोरिया सरकारले सहयोग गर्न आग्रह गर्दछु ।’
श्रममन्त्री भण्डारीले नेपाल र दक्षिण कोरियाबीच भएको श्रम सम्झौतालाई पुनरावलोकन गरी नवीकरण गर्नुपर्ने बताए । ‘सीपयुक्त श्रमिकलाई दक्षिण कोरिया पठाउनेसम्बन्धी कार्यविधि, ईपीएसको परीक्षा उत्तीर्ण भई रोस्टरमा रहेका नेपाली कामदारलाई शीघ्र रोजगारमा पठाउन थप सहजीकरण गर्नुपर्नेछ,’ उनले भने ।
नेपालका लागि दक्षिण कोरियाका राजदूत योङले नेपाली कामदारको उच्च कदर गर्दै नेपालबाट निरन्तर रुपमा कामदार लैजाने बताए । ‘रोस्टरमा नाम समावेश भएका व्यक्तिलाई उच्च प्राथमिकताका साथ रोजगारमा लैजान पहल गर्ने र थप नेपाली कामदार लैजाने विषयमा आफू सकारात्मक छु,’ उनले भने ।
