काठमाडौं, २९ असार । अमेरिकी सहायक विदेशमन्त्री डोनाल्ड लू काठमाडौं आइपुगेका छन्। उनी शुक्रबार बिहान ११ बजेर ३५ मिनेटमा त्रिभुवन अन्तर्राष्ट्रिय विमानस्थालमा ओर्लिए।
अमेरिकी राजदूतावासका अनुसार उनी केही बेर द्धारिका होटलमा आराम गरेपछि महारगन्जस्थित् अमेरिकी दूतावास पुग्नेछन्। अमेरिकी दूतावासबाट उनी पूर्वप्रधानमन्त्री एवं नेपाली कांग्रेसका सभापति शेरबहादुर देउवालाई भेट्न धुम्बाराही पुग्नेछन्।
देउवासँगको भेटपछि उनी केही समयका लागि छाउनी पुग्ने कार्यक्रम रहेको छ। छाउनीबाट उनी सिधैं परराष्ट्र मन्त्रालय जानेछन्। परराष्ट्रमन्त्री एनपी साउदसँग भेटवार्ता गर्नेछन्।
साउदसँगको भेटपछि उनी पूर्वप्रधानमन्त्री एवं एमाले अध्यक्ष केपी शर्मा ओलीलाई भेट्न एमालेको पार्टी कार्यालय च्यासल पुग्नेछन्। च्यासलको भेटपछि उनी प्रधानमन्त्री एवं माओवादी केन्द्रका अध्यक्ष पुष्पकमल दाहालसँग विशेष भेटवार्ता गर्न प्रधानमन्त्रीको सरकारी निवास बालुवाटार पुग्नेछन्।
भेटपछि उनले बालुवाटारमा नै रात्रिभोजको आयोजना गरेका छन्।
बंगलादेशहुँदै काठमाडौं आएका सहायक विदेशमन्त्री डोनाल्ड लू १५ घण्टा नेपालमा बिताएर राति २: १५ बजे नेपालबाट प्रस्थान हुने कार्यतालिका रहेको छ।
