काठमाडौं– नेकपा एकीकृत समाजवादीका सम्मानीत नेता झलनाथ खनालले आफुले पार्टी छाड्ने वा राजीनामा दिने कल्पना समेत गर्न नसक्ने बताएका छन् ।
शनिबार आफ्नै निवास डल्लुमा सञ्चारकर्मीसँग कुरा गर्दै खनालले विद्रोह गरेर निर्माण गरेको पार्टीलाई वैचारिक र सैद्धान्तिक रुपमा सुदृढ गर्नुपर्ने भन्दै कसैले भन्दैमा पार्टी छाड्ने वा राजीनामा दिने कल्पना समेत गर्न नसक्ने बताएका हुन् ।
उनले आफ्नो अन्तर्वार्ताका आधारका पार्टी अध्यक्षले पार्टी छोड भन्नु तल्लो स्तरको चिन्तन भएको टिप्पणी गरे । खनालले आफूले नभइ पार्टी चलाउन सक्ने क्षमता नभएकाले पार्टी छाड्नुपर्ने तर्क गरेका छन् ।
उनले एमालेबाट विद्रोह गरेर नयाँ पार्टी बनाउनुको औचित्य पुष्टि हुन नसकेकाले औचित्य पुष्टि हुनेगरी पार्टी आन्दोलनलाई अघि बढाउनुपर्नेमा जोड दिए ।
पार्टी विद्रोह गरेको कुरालाई आफूले गलत नभनेको स्पष्ट पार्दै खनालले विद्रोहको औचित्य स्थापित हुन नसके विद्रोह स्वतः गलत हुन जाने जिकिर गरे ।
खनालले आफूले पार्टीमा वैज्ञानिक समाजवादमा जोड दिए पनि पार्टी अध्यक्ष पुरानै जबजको पछि लागेको तर्क गरे । खनालले समाजवादी मोर्चाको कुनै गन्तव्य नरहेकाले यसप्रति आफ्नो सकारात्मक विश्वास नरहेको बताए ।
