काठमाडौं–पशुपति आर्यघाटमा जलाउँदै गरेको शवबाट हड्डी निकालेको आरोपमा प्रहरीले दुई जनालाई पक्राउ गरेको छ।
आर्यघाटमा शव दहन गर्ने क्रममा शवबाट मांसपदार्थ र हड्डीको चोरी हुने गरेको अनौठो घटना सार्वजनिक भएसँगै प्रहरीले अनुसन्धान थालेको छ।
प्रहरीको प्रारम्भिक अनुमान छ- शवबाट मासु र हड्डी निकालेर मसान जगाउने अघोरी बाबालाई बेचिन्छ।
मलामीले दिएको निवेदनका आधारमा पक्राउ पर्नेमा घाटमा शव जलाउने काम गर्दै आएका ब्राह्मण गणेश ढकाल र उनका एक जना सहयोगी छन् । काभ्रेको बनेपा नगरपालिका–९ का राम शाही नाम गरेका मृतकको शवबाट उनीहरूले हड्डी निकालेको आरोप छ । एसपी चन्दले भने, ‘हड्डी निकालेर अर्कोलाई दिएको मृतकका परिवारले आरोप लगाएका छन्, हामी अनुसन्धान गर्दैछौँ।’
मानिसको शवबाट मासु र हड्डी चोरी हुने घटनानै प्रहरीका लागि नयाँ हो। यसमा पक्राउ गरेका व्यक्तिलाई कुन कानुनअनुसार कारवाही र अनुसन्धान गर्ने भन्नेमै अन्यौलता रहेको प्रहरीले बताएको छ। डीएसपी खनालका अनुसार आइतबार अभद्र व्यवहारमा म्याद थप गरी घटनाबारे थप अनुसन्धान गरिने भएको छ।
