काठमाडौं– हमासद्वारा बन्धक बनाइएका बिपिन जोशीको रिहाइका लागि इजरायल पुगेकी आमा पदमा जोशीले इजरायली राष्ट्रपति इसाक हरजगसँग भेटवार्ता गरेकी छन् ।
आइतबार विपिनकी आमा पदमा जोशी, बहिनी पुष्पा जोशीका साथै इजरायलस्थित नेपाली राजदूत धन प्रसाद पण्डितले आज इजरायली राष्ट्रपतिसँग शिष्टाचार भेटवार्ता गरेका हुन् ।
भेटवार्तामा विपिनकी आमाले छोराको शीघ्र रिहाइको लागि पहल गरिदिन इजरायली राष्ट्रपतिसमक्ष आग्रह गरेकी छन् । यस्तै विपिनकी बहिनी पुष्पाले आफ्नो दाजु(विपिन) एक विद्यार्थीको रूपमा इजरायल आएको बताउँदै रिहाइका लागि हरसम्भव पहल गर्न आग्रह गरिन् ।
त्यस अवसरमा राजदूत पण्डितले समेत पुनः विभिन्न तवरबाट पहल गरी विपिन जोशीको स्थितिको बारेमा जानकारी गराइदिन आग्रह गरे । राष्ट्रपतिले हरजगले विपिन आफ्नै नागरिक जस्तो लागेको बताउँदै रिहाइको लागि सरकार प्रयास गरिरहेको बताए ।
आजै उनीहरुले इजरायली संसद्का अध्यक्ष अमिर ओहनासँग समेत भेटघाट गरी बिपिन जोशीको रिहाइको लागि आग्रह गरेका थिए ।
