काठमाडौं –जेन-जी आन्दोलनको क्रममा भदौ २४ गते कारागारबाट भागेका पूर्वऊर्जा मन्त्री टोपबहादुर रायमाझी कारागार फर्किएका छन्।
उनी सोमबार साँझ सुन्धरा कारागार फर्किएका हुन्।
नक्कली भुटानी शरणार्थी प्रकरणमा पुर्पक्षका लागि थुनामा रहेका पूर्वउपप्रधान तथा पूर्वऊर्जा मन्त्री रायमाझी आफै कारागार फर्किएको सुन्धारा कारागारका प्रमुख कृष्णप्रसाद चापागाईंले जानकारी दिए।
उनका अनुसार भुटानी शरणार्थी प्रकरणकै कारागारमा रहेका पूर्वगृह सचिव टेकनारायण पाण्डे भने फर्किएका छैनन्।
कतिपयलाई खोज्ने काम भइरहेको उनले बताए। कतिले आफै आउने जानकारी समेत गराएका छन्।
सुन काण्ड र सनम हत्याका मुख्य अभियुक्त चुडामणि उप्रेती (गोरे) पनि सोही दिन फर्किएको कारागार प्रमुख चापागाईंले बताए।
सेन्ट्रल जेलका थुप्रै कैदी बन्दी अन्यत्र कारागारमा फर्किएका छन्। त्यहाँबाट भागेका ३३ सयमा कैदी बन्दीमध्ये एक हजारको हाराहारीमा मात्रै फर्किएको र करिब सयको हाराहारीका कैदीबन्दी देशका विभिन्न जिल्लाका कारागारमा गएको सेन्ट्रल जेलका प्रशासक कृष्णप्रसाद चापागाइँले बताएका छन्।
