काठमाडौं – नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ले पूर्वप्रधानमन्त्री केपी शर्मा ओलीकै सिफारिसमा सुशीला कार्कीलाई प्रधानमन्त्रीमा नियुक्त गरिएको दाबी गरेका छन् ।
शुक्रबार प्रेस सेन्टरले आयोजना गरेको सम्पादकहरूसँगको अन्तरक्रियामा बोल्दै दाहालले ओली नेतृत्वको काम चलाउ सरकारको तर्फबाट राष्ट्रपतिलाई लेखिएको सिफारिस पत्रकै आधारमा कार्की प्रधानमन्त्री बनेको बताएका हुन् ।
‘हामीलाई देखाइएको कागजातअनुसार तत्कालीन प्रधानमन्त्री ओलीले राष्ट्रपतिलाई चिठी दिएर सिफारिस गर्नुभएको थियो,’ दाहालले भने, ‘अब आएर त्यसको अस्वीकार गर्नुको अर्थ छैन।’
प्रचण्डको टिप्पणी ओलीले एक दिनअगाडि, बिहीबार, भक्तपुरमा आयोजित एमाले कार्यक्रममार्फत कार्कीको नेतृत्वको सरकारलाई ‘असंवैधानिक’ भनेको प्रसंगपछि आएको हो ।
दाहालका अनुसार कार्कीको नाम युवाहरूको मिटिङबाट आएको थियो र बालेन शाहले प्रस्ताव अस्वीकार गरेपछि उनी अगाडि आएकी हुन् । ‘प्रधानमन्त्रीको सिफारिस बिना राष्ट्रपतिले नियुक्ति गर्न सक्दैनन्,’ उनले भने, ‘ओली नै काम चलाउ प्रधानमन्त्री भएकाले सिफारिस उहाँबाटै आएको हो।’
दाहालले कार्कीको नियुक्ति आवश्यकताको सिद्धान्त अनुसार भएको बताए। ‘त्यस समयमा डक्ट्रिन अफ नेसिसिटीको चर्चा खुब भएको थियो,’ दाहालले भने, ‘संविधानको धारा ६१, ६२ लाई टेकेर जे आवश्यकता छ त्यसको आधारमा सुशीला कार्कीलाई प्रधानमन्त्रीमा नियुक्ति गर्नुभएको हो।’
