काठमाडौँ – सरकारले मधेस प्रदेशकी प्रदेश प्रमुख सुमित्रा सुवेदी भण्डारीलाई पदमुक्त गरेको छ।
सोमबार बसेको मन्त्रिपरिषद् बैठकले उनीमाथि विवाद उत्पन्न भएपछि उनलाई पदबाट हटाउने निर्णय गरेको हो।
भण्डारीले आइतबार राति एमालेका सरोजकुमार यादवलाई मुख्यमन्त्री नियुक्त गरी होटलमै शपथ गराएपछि उनी विवादमा परेकी थिइन्।
महोत्तरी र सिन्धुलीको सिमानामा पर्ने एक होटलमा मध्यरातमा गरिएको सो शपथले राजनीतिक तहमा तीव्र प्रतिक्रिया उत्पन्न भएको थियो।
सरकारले भण्डारीलाई पदबाट हटाउँदै उनको स्थानमा सुरेन्द्र लाभलाई नयाँ प्रदेश प्रमुख नियुक्त गरेको जनाएको छ।
सरकारको निर्णय अनुसार लाभले अब नयाँ प्रदेश प्रमुखको रूपमा कार्यभार सम्हाल्नेछन्।
भण्डारीले आइतबारमात्रै अन्य पाँच दलका प्रतिनिधिहरूले नेपालको संविधानको धारा १६८ को उपधारा २ बमोजिम सरकार गठनका लागि गरेको दाबीमा ढिलाइ गरेकी थिइन्।
तर त्यसै रात उनले एमालेका यादवलाई मुख्यमन्त्री नियुक्त गरेकी थिइन्।
सरकारले उनलाई सो निर्णय गरेको १४ घन्टाभित्रै पदमुक्त गरेको हो।
यसअघि पाँच दलको समर्थनमा असोज २९ गते मुख्यमन्त्री बनेका जितेन्द्र प्रसाद सुनार (सोनल) ले विश्वासको मत पाउने सम्भावना नदेखिएपछि राजीनामा दिएका थिए।
सोनलले शनिबार राजीनामा दिएपछि नयाँ सरकार गठन प्रक्रिया अघि बढेको हो।
स्वास्थ्य उपचारको नाममा मधेस भवनबाट निस्केकी भण्डारीले सिन्धुली–महोत्तरीको सिमानामा रहेको होटलमा शपथ गराएको विषयले ठूलो राजनीतिक विवाद र आलोचना निम्त्याएको छ।
