गोरखा– अपाङ्गता भएका व्यक्तिहरूलाई सहयोग पुर्याउने उद्देश्यले गोरखा जेसीजले ह्वीलचेयर वितरण कार्यक्रम सञ्चालन गरेको छ। संस्थाका अनुसार हालसम्म सात जनालाई नि:शुल्क ह्वीलचेयर वितरण गरिसकिएको छ।
जेसीज गोरखाका अध्यक्ष सुमन गुरुङले पूर्ण अपाङ्गता भएका र आर्थिक अवस्था कमजोर व्यक्तिलाई प्राथमिकतासाथ समेत सहयोग गरिएको बताए। “हामीले मुख्यत: पूर्ण अपाङ्गता भएकालाई ह्वीलचेयर उपलब्ध गराउँदै आएका छौँ,” गुरुङले भने, “अन्य पालिकामा रहेका आवश्यकतामा परेकालाई पनि वितरण गर्ने तयारी भइरहेको छ।”
ह्वीलचेयर पाउनेमा गोरखा नगरपालिका–३ नारेश्वरका खड्गबहादुर बिक, मिठुमाया सिर्मल, गंगा कुमारी खड्का र पर्वत कुमाल रहेका छन्। साथै सिरानचोक गाउँपालिका–५ छोप्राकका रविन्द्र बिक र मनिष गुरुङ, तथा सिरानचोक–८ का एक अन्य व्यक्तिलाई पनि ह्वीलचेयर प्रदान गरिएको जेसीजले जनाएको छ।
गाउँपालिका अध्यक्ष र वडाध्यक्षको रोहवरमा वितरण कार्यक्रम सम्पन्न गरिएको थियो।
जेसीजले आगामी दिनमा अन्य पालिकामा रहेका पूर्ण अपाङ्गता भएका व्यक्तिहरूलाई पनि सहयोग विस्तार गर्ने जनाएको छ।
