काठमाडौँ – नेपाली कम्युनिस्ट पार्टीका पार्टी संयोजक पुष्पकमल दाहाल ‘प्रचण्ड’ले आफूलाई प्रधानमन्त्री बन्नुपर्ने कुनै विशेष आवश्यकता नरहेको भन्दै जनताको सेवकको रूपमा नै निरन्तर काम गर्ने बताएका छन्।
धादिङको बेनिघाट रोराङ गाउँपालिकाको नयाँ प्रशासकीय भवन उद्घाटन समारोहलाई सम्बोधन गर्दै उनले आफू किसान–मजदुर परिवारको छोरा भएको र जनताको सेवामा दशकौँदेखि समर्पित रहँदै आएको बताए।
गाउँपालिकाका अध्यक्ष कृष्ण बहादुर थपलियाले जनताप्रतिको सेवा भावसहित गरेको कामको प्रशंसा गर्दै आफूलाई सम्मानजनक रूपमा प्रस्तुति गरेको उल्लेख गर्दा प्रचण्डले ‘म भगवान् होइन, धेरै वर्षदेखि तपाईँहरूका निम्ति समर्पित जनताको सेवक हुँ’ भन्दै धन्यवाद व्यक्त गरे।
समारोहमा पार्टी नेता राजेन्द्र पाण्डेले आगामी निर्वाचनपछि फेरि प्रचण्डलाई प्रधानमन्त्रीको भूमिकामा हेर्न चाहेको टिप्पणी गरेपछि प्रचण्डले आफूलाई प्रधानमन्त्री भएर मात्र देश चलाउन सकिन्छ भन्ने नलागेको स्पष्ट पारे। उनले ‘प्रधानमन्त्री बन्ने खासै रुचि छैन, त्यसका लागि मरिहत्ते चाहना पनि छैन; तर देशले माग्यो, जनताले माग्यो भने जिम्मेवारीबाट पछि हट्ने मेरो स्वभाव छैन’ भन्दै पाण्डेले व्यक्त गरेको विश्वासप्रति आभार व्यक्त गरे। उनका अनुसार जनताले चाह्यो र देशले आवश्यक ठानेमा आफू जिम्मेवारीबाट कहिल्यै पन्छिनेछैनन्।
