काठमाडौँ – राष्ट्रिय खेलकुद परिषद् (राखेप)का सदस्यसचिव टंकलाल घिसिङले चार वर्षे कार्यकाल पूरा गरी शुक्रबार बिदाइ प्राप्त गरे।
युवा तथा खेलकुद मन्त्रालयको सिफारिसमा १३ मंसिर २०७८ मा मन्त्रिपरिषद्को निर्णयअनुसार घिसिङ राखेपको २३ औँ सदस्यसचिवमा नियुक्त भएका थिए। तत्कालीन शेरबहादुर देउवा नेतृत्वको सरकारले रमेश सिलवाललाई बर्खास्त गरेपछि सदस्यसचिव नियुक्तिका लागि मन्त्रालयले सिफारिस समिति गठन गरेको थियो।
मन्त्रालयले घिसिङको बिदाइपछि खेलकुद विकास ऐनअनुसार नयाँ सदस्यसचिव नियुक्तिको प्रक्रिया अघि बढाउने बताएको छ। नयाँ सदस्यसचिवको लागि सिफारिस समिति गठन गरिनेछ र प्राप्त नामहरूमध्येबाट मन्त्रिपरिषद्ले एक जनालाई नियुक्त गर्नेछ।
घिसिङ तत्कालीन नेकपा माओवादी केन्द्रको बागमती प्रदेश सचिवालय समितिका सदस्य तथा नेपाल रग्बी संघका अध्यक्ष पनि थिए। उनको नेतृत्वमा नेपाली खेलकुदले विभिन्न राष्ट्रिय र अन्तर्राष्ट्रिय प्रतियोगितामा सहभागिता जनाएको साथै भौतिक पूर्वाधार विकासमा महत्वपूर्ण कामहरू अघि बढाएको थियो।
उनको कार्यकालको मुख्य जिम्मेवारी राष्ट्रिय खेलकुद प्रतियोगिताको सफल आयोजनामा केन्द्रित रहेको थियो।
