काठमाडौँ – नेपाली कम्युनिस्ट पार्टी (नेकपा)का नेता नारायणकाजी श्रेष्ठले नेपाली जनताले चाहेअनुसार सामाजिक तथा आर्थिक रूपान्तरणले अपेक्षित फड्को मार्न नसकेको बताएका छन्। पोखरामा आयोजित एकता सन्देश सभालाई सम्बोधन गर्दै उनले देशको समग्र रूपान्तरण प्रक्रियाले जनताको चाहना पूरा गर्न नसकेको भन्दै गम्भीर चिन्ता व्यक्त गरे।
उनले पार्टीभित्र र कम्युनिस्ट आन्दोलनभित्र भएको विभाजन अब अन्त्य गर्ने बेला आएको बताए। श्रेष्ठका अनुसार एकताको मर्म आत्मसात गर्दै एउटै कम्युनिस्ट पार्टी निर्माण गर्ने लक्ष्यलाई व्यवहारिक रूपमा अघि बढाउनुपर्ने आवश्यक छ। उनका अनुसार विगतमा जस–जस समूह र घटकमा रहेका भए पनि अब सबै एकताबद्ध भएर अगाडि बढ्नु समयको माग हो।
श्रेष्ठले देशभक्त शक्ति तथा सुशासन र समृद्धिको पक्षमा रहेको सबै वर्गसँग इमानदार सहकार्यको मोर्चा बनाउन पनि आफूहरू अघि बढिरहेको बताए। उनका शब्दमा, कम्युनिस्ट शक्तिको एकीकरणसंगै राष्ट्रिय हितका विषयमा सबै देशभक्त शक्तिलाई एक ठाउँमा ल्याउने प्रयासलाई निरन्तरता दिइनुपर्नेछ।
उनका अनुसार अबको परिस्थितिले ठूलो शक्ति निर्माण गर्दै राजनीतिक सङ्घर्षलाई प्रभावकारी ढङ्गले अघि बढाउन आवश्यक पारेको छ। उनले निर्वाचनलाई समेत परिवर्तनको मुख्य मोर्चा बनाउँदै राष्ट्रिय रुपान्तरणका कार्यहरूलाई सुदृढ गर्न ध्यान दिनुपर्ने उल्लेख गरे।
