पोखरा, चिप्लेढुंगा — नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले देश गम्भीर राष्ट्रिय संकटको सामना गरिरहेको बताउँदै त्यसबाट मुक्ति दिलाउन सबै देशभक्त शक्ति एकजुट हुनुपर्ने धारणा व्यक्त गर्नुभएको छ। पोखरा चिप्लेढुंगामा आयोजित एकता सन्देश सभालाई सम्बोधन गर्दै उहाँले राज्यको राष्ट्रिय स्वाधिनता र सुरक्षा कमजोर बन्दै गएको अवस्थामा वामपन्थी, कम्युनिस्ट तथा सबै देशभक्त शक्तिहरूबीच व्यापक एकता अपरिहार्य भएको उल्लेख गर्नुभयो।
प्रचण्डले एमाले र कांग्रेसले पाएको “दुई तिहाइ बहुमत” बाट जनताले के हासिल गर्न सके भन्ने प्रश्न उठाउँदै दुवै दलका कारण देश आज संकटपूर्ण मोडमा पुगेको टिप्पणी गर्नुभयो। उहाँले सरकारमा रहँदा भ्रष्टाचारविरुद्ध लड्ने प्रयासलाई अवरुद्ध गरिएको आरोप लगाउँदै राजनीतिक स्वार्थका कारण राष्ट्रहितका मुद्दा उपेक्षित भएको बताउनुभयो। उहाँका अनुसार भ्रष्टाचार र राष्ट्रिय स्वाधिनताका विषयमा कडा रूपमा लड्न आफूहरूलाई आवश्यक शक्ति उपलब्ध गराइएन।
प्रचण्डले सुरु गरिएको ‘एकता अभियान’ चुनाव जित्ने अभिप्रायका लागि मात्र नभई राष्ट्रिय स्वाधिनता रक्षा, समृद्धिको पूर्वाधार निर्माण र राजनीतिक दायित्व पूरा गर्न आवश्यक कदम भएको स्पष्ट पार्नुभयो। उहाँले चुनाव जित्नु चुनौती नभए पनि राष्ट्र जोगाउन जनताको राष्ट्रिय एकता अत्यावश्यक रहेको उल्लेख गर्दै मुलुकलाई स्थिरता र दिशा दिन सबै पक्षको साझा प्रतिबद्धता जरुरी भएको बताउनुभयो।
आगामी फागुन २१ मा तोकिएको निर्वाचन तोकिएकै दिन गर्नुपर्नेमा प्रचण्ड स्पष्ट हुनुहुन्थ्यो। उहाँले चुनावी वातावरण निर्माण गर्न सरकार सक्रिय हुनुपर्ने आवश्यकता औंल्याउँदै हाल सरकार सम्बन्धित सबै पक्षहरूसँग छलफलमा रहेको र निर्वाचन निश्चित हुने विश्वास व्यक्त गर्नुभयो। “जसको जनाधार बढी छ, उसलाई बेवास्ता गरेर चुनावी वातावरण बनाउन खोज्नु गलत हुन्छ,” उहाँले चेतावनी स्वरूप भन्नुभयो।
देशमा जनता संगठित र सचेत नभए पुनः ठूलो संकट निम्तिन सक्ने चेतावनी दिंदै प्रचण्डले राष्ट्रियताको भावना बलियो बनाउन सबै नागरिकको भूमिका निर्णायक हुने उल्लेख गर्नुभयो। सभामा सहभागी कार्यकर्ताहरूले प्रचण्डको अभिव्यक्तिलाई देश राजनीतिक रूपमा संवेदनशील मोडमा पुगेको संकेतका रूपमा लिएको बताइएको छ।
