काठमाडौँ — चितवनको पर्यटकीय नगरी सौराहामा प्रत्येक वर्ष आयोजना हुने हात्ती तथा पर्यटन महोत्सव यस वर्ष पुस ११ देखि १३ गतेसम्म हुने भएको छ। क्षेत्रीय होटेल संघ नेपाल, चितवनको आयोजनामा र युनाइटेड हात्ती सञ्चालन सहकारी संस्थाको सहआयोजनमा सम्पन्न हुने यस महोत्सवले सौराहाको पर्यटन विकासमा नयाँ ऊर्जा थप्ने अपेक्षा गरिएको छ।
विसं २०५५ देखि निरन्तर हुँदै आएको महोत्सवमा यस वर्ष हात्तीको शृंगार प्रतियोगिता, हात्ती वनभोज, स्वास्थ्य शिविर, हात्तीको दिनचर्या सम्बन्धी जानकारी लगायत विविध कार्यक्रमहरू सञ्चालन हुने आयोजकहरूले बताएका छन्। महोत्सव संयोजक गुणराज थपलियाका अनुसार पालिकास्तरीय डुङ्गा दौड प्रतियोगिता, हात्ती मैत्री खेलकुद, हात्ती, जिप र डुङ्गा सफारी गराइने छ। यस अवसरमा करिब ८० हात्ती सहभागी हुनेछन्।
आयोजकहरूले महोत्सवका क्रममा चित्रकला प्रतियोगिता, मानव–वन्यजन्तु सहअस्तित्व, पर्यावरण संरक्षण र हात्तीको महत्व सम्बन्धी विद्यालयस्तरीय वक्तृत्वकला प्रतियोगितासहित, संरक्षणकर्मी, वातावरणविद् तथा पूर्वसंरक्षण अधिकृतहरूद्वारा सन्देशमूलक सामग्री प्रदर्शनी हुने बताए।
संयोजक थपलियाका अनुसार महोत्सवले २५–३० प्रतिशत पर्यटक आगमन वृद्धि गर्न सक्ने अनुमान छ। सो अवधिमा आएका पाहुनाहरूका लागि क्षेत्रीय होटेल संघ र रेवान सौराहाका सदस्यहरूले होटेल तथा रेष्टुरेन्टमा १० प्रतिशत छुट प्रदान गर्ने व्यवस्था मिलाएका छन्।
क्षेत्रीय होटेल संघका अध्यक्ष ओमप्रकाश पाण्डेले महोत्सवमा २५ वटा स्टलहरू राखिने र करिब २० हजार दर्शकको सहभागिता हुने अपेक्षा गरिएको जानकारी दिए। उनले भने, “चितवन जैविक विविधता र वन्यजन्तुको पर्यटकीय राजधानी हो। यहाँको सफारी पर्यटनमा हात्तीको भूमिका अपरिहार्य छ।”
चितवन राष्ट्रिय निकुञ्जको प्रमुख प्रवेशद्वार सौराहामा हुने महोत्सवले केवल पर्यटन प्रवर्द्धन मात्र नभई, स्थानीय रोजगार सृजनामा पनि महत्वपूर्ण योगदान पुर्याउने विश्वास आयोजकको छ।
