नेकपा निकट वाइसीएलका पूर्व उपाध्यक्ष प्रेम श्रेष्ठको नेतृत्वमा रहेको समूहलाई सोमबार रास्वपाका उपसभापति डा. स्वर्णिम वाग्लेले पार्टी केन्द्रीय कार्यालयमा पार्टीको लोगो लगाइ औपचारिक रूपमा स्वागत गरेका हुन्।
रास्वपामा प्रवेश गर्नेहरूमा नेकपा, नेपाली कांग्रेस र प्रलोपाका जिम्मेवार नेताहरूका साथै पूर्व सुरक्षा अधिकारीहरू समेत रहेका छन्। विशेषगरी वामपन्थी राजनीतिमा लामो समयदेखि सक्रिय नेकपा पर्यटन विभागका केन्द्रीय सदस्य नवराज अम्गाई, अमृत श्रेष्ठ, तेजकुमार विक र भरत भट्ट रास्वपाको अभियानमा जोडिएका छन्। उनीहरूले देशको वर्तमान राजनीतिक अभ्यासमा नयाँ सोच र वैकल्पिक धार आवश्यक रहेको निष्कर्षसहित रास्वपा रोजेको बताएका छन्।
यसैगरी, नेपाली कांग्रेसबाट गोरखा क्षेत्र नं. १ (क) का सचिव भरत रेग्मी र भक्त ढकालले पनि कांग्रेस परित्याग गरी रास्वपाको सदस्यता लिएका छन्। उनीहरूले पुराना दलहरू जनताको अपेक्षा अनुसार अघि बढ्न नसकेको र राजनीतिक सुधारको आशा रास्वपाबाट मात्रै देखिएको धारणा व्यक्त गरे।
सुरक्षा निकायबाट अवकाश प्राप्त पूर्व प्रहरी उपरीक्षक (एसपी) जीवन श्रेष्ठ पनि रास्वपामा प्रवेश गरेका छन्। उनीसँगै उत्तरकुमार श्रेष्ठलगायत विभिन्न क्षेत्रका अनुभवी व्यक्तिहरूले पनि पार्टी सदस्यता ग्रहण गरेका छन्। प्रशासनिक तथा सुरक्षा अनुभव भएका व्यक्तित्वहरूको सहभागिताले पार्टीलाई नीतिगत र सङ्गठनात्मक रूपमा थप सबल बनाउने अपेक्षा गरिएको छ।
नवप्रवेशीहरूलाई स्वागत गर्दै रास्वपाका उपसभापति डा. स्वर्णिम वाग्लेले देश रूपान्तरणको महाअभियानमा अनुभवी, बौद्धिक र कर्मठ व्यक्तिहरूको आगमनले पार्टीलाई थप ऊर्जा प्राप्त भएको बताए।
कार्यक्रममा बोल्दै नवप्रवेशी समूहका नेतृत्वकर्ता प्रेम श्रेष्ठले मुलुकको समृद्धि र परिवर्तनको स्पष्ट खाका रास्वपामा मात्रै देखिएकाले सामूहिक रूपमा पार्टी प्रवेश गर्ने निर्णय गरिएको स्पष्ट पारे।
