काठमाडौं — रमेश कर्पले काठमाडौंको गोदावरी भिलेज रिसोर्टमा एक भव्य र उत्साहपूर्ण कार्यक्रमको आयोजना गर्दै आफ्नो ६औँ संस्थापक दिवस मनाएको छ।
“सधैं सँगै, हरेक पलमा” भन्ने मूल नाराका साथ आयोजित यस कार्यक्रमले कर्मचारी र व्यवस्थापनबीच एकता, कृतज्ञता र साझा लक्ष्यको अनुभूति गराएको छ । कार्यक्रमलाई जीवन्त र अविस्मरणीय बनाउन खेलकुद, सांगीतिक प्रस्तुति, मनोरञ्जन र स्वादिष्ट परिकारका स्टलहरू राखिएको थियो, जसले रमेश कर्प परिवारका सदस्यहरूबीच सहकार्य र सम्बन्धलाई थप बलियो बनाउने अवसर प्रदान गरेको छ ।
रमेश कर्पमा हरेक वर्ष चैत्र ६ गते संस्थापक दिवस मनाइन्छ, जसले स्वर्गीय अध्यक्ष इमिरेट्स रमेश गुप्ताको जन्मजयन्तीको स्मरण गराउँछ । संस्थापकको दूरदर्शी नेतृत्व र इमानदारी, अग्रणी सोच, गतिशीलता, वास्तविकता र व्यावसायिकता जस्ता मूल्य-मान्यताले नै कम्पनीको बलियो आधार तयार पारेको थियो । यस विशेष दिनले ती आधारभूत मूल्यहरूलाई पुनः पुष्टि गर्दै संस्थापकको अतुलनीय योगदानप्रति उच्च सम्मान व्यक्त गरेको छ ।
संस्थापक दिवसको मुख्य आकर्षणको रूपमा रहेको पुरस्कार समारोहमा कर्मचारीहरूको समर्पण, नेतृत्व र योगदानको कदर गरियो । उक्त अवसरमा फाउन्डर लोयल्टी अवार्ड, रमेश गुप्ता भिजनरी लिडरसिप अवार्ड, रमेश गुप्ता राइजिङ लिडर अवार्ड, फाउन्डर्स स्टार पर्फर्मर अवार्ड, राइजिङ स्टार अवार्ड र एक्सीलेन्स इन लिडरसिप अवार्ड प्रदान गरिएको थियो । यी सम्मानहरूले कम्पनीका मूल्यहरू आत्मसात गर्ने र संगठनको वृद्धिमा महत्वपूर्ण भूमिका खेल्ने व्यक्तिहरूको प्रयासलाई उजागर गरेको छ ।
६ वर्षको सफल यात्रा पूरा गरेको रमेश कर्पले भविष्यमा पनि नवप्रवर्तन, सुदृढ साझेदारी र व्यक्तिगत विकास तथा नेतृत्व सशक्तीकरणमा निरन्तर लाग्ने प्रतिबद्धता जनाएको छ । संस्थापकको मार्गनिर्देशन र कर्मचारीहरूको अटल समर्पणलाई ऊर्जाको रूपमा ग्रहण गर्दै रमेश कर्प नयाँ उपलब्धि र अवसरहरूको खोजीमा एकजुट भएर अगाडि बढिरहेको छ ।
