काठमाडौं– नेपाल वायु सेवा निगमको बेथिती र वाइडबडी जहाजमा भएको घोटालाको छानबिन गर्न समिति गठन गरिएको छ । संस्कृति पर्यटन तथा नागरिक उड्डयन मन्त्रालयका सहसचिव मुकेश डङ्गोलको संयोजकत्वमा पाँच सदस्यीय समिति गठन गरिएको मन्त्रालयका प्रवक्ता जयनारायण आचार्यले जानकारी दिए।
मन्त्रालयले बिहीबार (चैत ५) सचिवस्तरको निर्णयानुसार नेपाल वायुसेवा निगमको बेथिती र वाइडबडी जहाजमा भएको भ्रष्टाचार लगायतको विषयमा प्रमाण संकलन, अध्ययन एवम् छानबिन गरी कार्यान्वयन कार्ययोजनासहितको प्रतिवेदन एक महिना(तीस) दिनभित्र पेश गर्न भनिएको प्रवक्ता आचार्यले बताए । कार्यक्षेत्रगत शर्त (टीओआर) बमोजिम काम गर्ने गरी आवश्यक प्रमाण संकलन, अध्ययन एवम् छानबिन गरी प्रतिवेदन पेस गर्न भनिएको छ ।
स्रोतका अनुसार गोरखा निर्वाचन क्षेत्र नम्बर १ बाट प्रतिनिधि सभा सदस्यमा निर्वाचित सुदन गुरुङले छानबिन गर्न दबाब दिँदै ज्ञापनपत्र बुझाएका थिए।
