काठमाडौँ- सामान्य प्रशासनमन्त्री प्रतिभा रावलले सरुवा गरेका स्थानमा जान आनाकानी गर्न कर्मचारीहरूलाई मार्गप्रसस्त गर्न आग्रह गरेकी छन्।
मन्त्री रावलले मंगलबार भनिन्, ‘जनतालाई सहज सेवा दिन सरकार जुनसुकै चुनौतीहरू पनि सामना गर्न पनि तयार छ, सरकारले खटाएको ठाउँमा जान्न भन्ने छुट कसैलाई छैन,नजाने कर्मचारीले मार्ग प्रशस्त गर्नुपर्छ ।’
सङ्घीय मामिला तथा सामान्य प्रशासन मन्त्रालयले सोमबार ६३ जना उपसचिवको सरुवा गरेको थियो भने मङ्गलवार ६ जना सहसचिवको सरुवा गरेको छ।
यसअघि रिक्त रहेको नगरपालिका तथा उपमहानगरपालिकामा खटाइएका कर्मचारीहरू काठमाडौँ बाहिर जान आनाकानी गरेपछि मन्त्री रावलले चेतावनी दिएकी हुन्।
मन्त्रालयले यसअघि प्रमुख प्रशासकिय अधिकृतविहीन रहेका नगरपालिकामा सोमबार र उपमहानगरपालिकामा मङ्गलबार कर्मचारी पठाएको छ।
अब एक दुई दिनमै कर्मचारी विहीन भएका गाउँपालिकाहरूमा पनि कर्मचारी खटाउने तयारी भइरहेको मन्त्रालयले जनाएको छ।
