गोरखा — गम्भीर स्वास्थ्य समस्या देखिएका बिरामीलाई उपचारका लागि जिल्ला बाहिर लैजानुपर्ने बाध्यता कम गर्ने उद्देश्यले एनपीआई गोरखा अस्पतालले सघन उपचार कक्ष (आईसीयू) सेवा विस्तार गरेको छ। सेवा विस्तारसँगै गोरखा तथा आसपासका क्षेत्रका नागरिकले जिल्लामै सघन उपचार सेवा पाउने भएका छन्।
अस्पतालका अनुसार नयाँ व्यवस्थासँगै गम्भीर अवस्थाका बिरामी, आकस्मिक अवस्थामा रहेका बिरामी, शल्यक्रियापछि निरन्तर चिकित्सकीय निगरानी आवश्यक पर्ने तथा विशेष उपचार र निगरानी चाहिने बिरामीलाई आईसीयू सेवा उपलब्ध हुनेछ।
अस्पतालका सञ्चालक तथा मेडिकल डाइरेक्टर संगम बाबु श्रेष्ठ ले गोरखाका नागरिकलाई गम्भीर अवस्थामा समेत जिल्लामै गुणस्तरीय उपचार उपलब्ध गराउने उद्देश्यले अस्पतालले स्वास्थ्य सेवाको दायरा विस्तार गर्दै आएको बताउनुभयो।
“गोरखाका नागरिकले गम्भीर अवस्थामा पनि जिल्लामै गुणस्तरीय उपचार पाउन सकून् भन्ने हाम्रो मुख्य उद्देश्य हो,” श्रेष्ठले भन्नुभयो, “आईसीयू सेवाको विस्तारसँगै विशेषज्ञ सेवा, आकस्मिक उपचार र अत्याधुनिक स्वास्थ्य सेवाहरूलाई अझ प्रभावकारी बनाउँदै लैजाने हाम्रो प्रतिबद्धता छ।”
गम्भीर बिरामीको उपचारमा समयमै चिकित्सकीय निगरानी र आवश्यक उपचार उपलब्ध हुनु महत्वपूर्ण मानिन्छ। जिल्लामै आईसीयू सेवा विस्तार भएपछि आकस्मिक तथा जटिल अवस्थाका बिरामीलाई तत्काल सघन निगरानीसहित उपचार उपलब्ध गराउन सहज हुने अस्पतालको विश्वास छ।
यसअघि गम्भीर प्रकृतिका बिरामीलाई थप उपचारका लागि जिल्लाबाहिरका स्वास्थ्य संस्थामा लैजानुपर्ने अवस्था आउने गरेकोमा आईसीयू सेवाको विस्तारले त्यस्ता बिरामीलाई प्रारम्भिक तथा सघन उपचार जिल्लामै उपलब्ध गराउन सहयोग पुग्ने अपेक्षा गरिएको छ।
अस्पतालले आगामी दिनमा पनि विशेषज्ञ सेवा, आकस्मिक उपचार तथा अन्य अत्यावश्यक स्वास्थ्य सेवाको विस्तारलाई प्राथमिकतामा राख्ने जनाएको छ।
आईसीयू सेवाको विस्तारसँगै गोरखा जिल्लामा गुणस्तरीय स्वास्थ्य सेवाको पहुँच थप विस्तार हुने र उपचारका लागि बाहिरी जिल्लामा निर्भर हुनुपर्ने अवस्थालाई क्रमशः कम गर्न सहयोग पुग्ने अपेक्षा गरिएको छ।
