काठमाडौं — नेपाली कांग्रेसको १५औँ महाधिवेशनमा मधेशी क्लस्टरतर्फ सहमहामन्त्री पदका लागि मनिषकुमार मिश्रले औपचारिक रूपमा उम्मेदवारी दर्ता गराएका छन्।
मंगलबार राष्ट्रिय सभागृहस्थित उम्मेदवारी दर्ता स्थल पुगेर मिश्रले सहमहामन्त्री पदमा आफ्नो दाबी प्रस्तुत गरेका हुन्।
मधेशको राजनीतिमा लामो समय सक्रिय रहेका मिश्रले पछिल्लो समय कांग्रेसभित्र आफ्नो राजनीतिक भूमिकालाई फराकिलो बनाउँदै आएका छन्। उनले सहमहामन्त्रीको उम्मेदवारीमार्फत मधेशको राजनीतिक आवाजलाई कांग्रेसको केन्द्रीय नेतृत्वमा अझ प्रभावकारी ढंगले स्थापित गर्ने र पार्टी संगठनलाई बलियो बनाउने लक्ष्य अघि सारेका छन्।
मिश्रको राजनीतिक यात्रा भने कांग्रेसबाटै सुरु भएको हो। पछि उनी मधेश केन्द्रित राजनीतिमा सक्रिय भए। महन्थ ठाकुर नेतृत्वको लोकतान्त्रिक समाजवादी पार्टी (लोसपा)मा रहँदा उनले केन्द्रीय महासचिव तथा प्रवक्ताको जिम्मेवारी समेत सम्हालेका थिए। मधेश केन्द्रित राजनीतिमा लामो अनुभव हासिल गरेपछि उनी पुनः नेपाली कांग्रेसको मूलधारमा फर्किएका हुन्।
निर्वाचनअघि कांग्रेस प्रवेश गरेका मिश्रलाई पार्टी सभापति गगनकुमार थापाले असोजमा केन्द्रीय कार्यसमिति सदस्यमा मनोनित गरेका थिए। त्यसअघि उनी लोसपामा महासचिवको भूमिकामा थिए।
कांग्रेसमा फर्किएपछि मिश्रले आफ्नो राजनीतिक आधारक्षेत्र सर्लाही–४ लाई केन्द्रमा राखेर संगठन निर्माण र जनसम्पर्कलाई निरन्तरता दिएका छन्। पछिल्लो क्षेत्रीय अधिवेशनबाट उनी सर्लाही–४ बाट महाधिवेशन प्रतिनिधिमा सर्वसम्मत चयन भएका थिए।
मधेशी क्लस्टरमा आठ जनाको भिडन्त
मिश्रले रोजेको मधेशी क्लस्टरको सहमहामन्त्री पदमा प्रतिस्पर्धा भने कडा देखिएको छ। एक पदका लागि आठ जना उम्मेदवार चुनावी मैदानमा छन्।
उम्मेदवारहरूमा अजयकुमार चौरसिया, अभिषेकप्रताप शाह, किरण यादव, नगिना यादव, मनिषकुमार मिश्र, महेन्द्र यादव, मुक्ता कुमारी यादव र रामपल्टन शाह रहेका छन्।
यस प्रतिस्पर्धामा मिश्रको विशेषता भनेको कांग्रेसको पुरानो राजनीतिक पृष्ठभूमिसँगै मधेश केन्द्रित दलमा काम गरेको अनुभव हो। त्यसैले उनको उम्मेदवारीलाई केवल एउटा पदको प्रतिस्पर्धाका रूपमा मात्र नभई मधेश राजनीतिमा लामो अनुभव बोकेर कांग्रेसको केन्द्रीय संरचनामा पुनः प्रभाव विस्तार गर्ने प्रयासका रूपमा पनि हेरिएको छ।
मिश्रले संगठन, मधेशको प्रतिनिधित्व र नयाँ पुस्ताको सहभागितालाई आफ्नो प्राथमिकतामा राख्दै अघि बढेको बताएका छन्। अब उनको राजनीतिक अनुभव, सर्लाहीमा बनाएको संगठनात्मक आधार र कांग्रेसभित्रको पछिल्लो सक्रियताले उनलाई कति मत दिलाउँछ भन्ने विषय महाधिवेशनको परिणामले तय गर्नेछ।
समग्रमा, मधेशी क्लस्टरमा आठ उम्मेदवारबीच हुने प्रतिस्पर्धामा मनिष मिश्रको उम्मेदवारीलाई कांग्रेसभित्र मधेशबाट उदाउँदै गरेको नयाँ राजनीतिक समीकरणका रूपमा समेत चासोका साथ हेरिएको छ।
