काठमाडौं – सरकारले नेपाल बीमा प्राधिकरणको अध्यक्षमा राजनविक्रम थापालाई नियुक्त गरेको छ।
मंगलबार बसेको मन्त्रिपरिषद् बैठकले अर्थ मन्त्रालयद्वारा गठित छनोट समितिको सिफारिसका आधारमा थापालाई अध्यक्ष बनाउने निर्णय गरेको हो।
नियुक्तिसँगै थापाले बुधबार अर्थमन्त्री डा. स्वर्णिम वाग्लेसमक्ष पद तथा गोपनीयताको शपथ लिएका छन्। शपथपछि उनले बिहीबारदेखि प्राधिकरणको अध्यक्षका रूपमा जिम्मेवारी सम्हालेका छन्।
नेपाल राष्ट्र बैंकमा कार्यकारी निर्देशकका रूपमा कार्यरत थापासँग बैंकिङ तथा वित्तीय क्षेत्रको करिब तीन दशकको अनुभव छ। राष्ट्र बैंकमा रहँदा उनले वित्तीय संस्था सुपरिवेक्षण, नियमन तथा जोखिम व्यवस्थापनसम्बन्धी जिम्मेवारी सम्हालेका थिए।
यसअघि राष्ट्रिय बीमा संस्थानमा निर्देशक तथा लगानी समितिको संयोजकका रूपमा पनि उनले काम गरेका थिए। त्यस्तै, निक्षेप तथा कर्जा सुरक्षण कोषको सञ्चालक समिति र लगानी समितिमा समेत उनको अनुभव रहेको छ।
अर्थमन्त्री वाग्लेले शपथ ग्रहणपछि नवनियुक्त अध्यक्षलाई बीमा क्षेत्रको विकास र विस्तारका लागि निर्भीक भएर काम गर्न निर्देशन दिएका छन्।
थापाको नियुक्तिसँगै बीमा क्षेत्रको नियमनलाई थप प्रभावकारी बनाउने, बीमितको हित संरक्षण गर्ने तथा बीमाप्रतिको जनविश्वास अभिवृद्धि गर्ने जिम्मेवारी नयाँ नेतृत्वसामु आएको छ।
बीमा बजारको विस्तारसँगै नियामकीय क्षमता, संस्थागत सुशासन र वित्तीय अनुशासनलाई सुदृढ बनाउनु उनको कार्यकालका महत्वपूर्ण चुनौती हुने देखिन्छ।
