काठमाडौँ –पूर्वसञ्चार तथा सूचना प्रविधिमन्त्री गोकुल बास्कोटाले जनतालाई सहीरुपमा सुसूचित गर्न राज्यको मिडियाको जरुरी भएको बताएका छन्। रेडियो नेपाल कर्मचारी युनियनले आज बडादसैँका अवसरमा आयोजना गरेको शुभकामना आदानप्रदान कार्यक्रममा उहाँले सरकारी सञ्चारमाध्यमको राज्यका लागि जरुरी भएको बताए।
“राज्यका सञ्चारमाध्यमको दायित्व नाफा कमाउनु नभई आम नागरिकलाई सुसूचित गर्नु हो”, नेकपा एमालेका पोलिटब्युरो सदस्य बाँस्कोटाले भने, “रेडियो नेपाल र नेपाल टेलिभिजनलाई सार्वजानिक प्रसारण सेवा संस्थाका रुपमा रुपान्तरण गर्दा राज्यले यसको स्वायत्तता तथा आर्थिक दायित्व निर्वाह गर्ने गरी ऐन ल्याउनुपर्छ।”
प्रतिनिधिसभा सदस्य बाँस्कोटाले जोखिम तथा सङ्कटको समयमा समेत राष्ट्रिय प्रसारणको दायित्व निर्वाह गर्ने रेडियो नेपालको इतिहास र भविष्य पनि बलियो रहेको उल्लेख राज्यले यसको विकास र व्यवस्थापनमा ध्यान दिन आवश्यक रहेको बताए। रेडियो नेपालको आन्तरिक समस्या समाधानका लागि विभाजनभन्दा व्यवस्थापक र कर्मचारीमा एकताको खाँचो रहेको उनको भनाइ थियो।
रेडियो नेपालका कार्यकारी निर्देशक बुद्धिबहादुर केसीले भौगोलिक विकटता र जनसाङ्ख्यिक हिसाबले रेडियो नेपाललाई सबैको सहज पहुँचमा पुर्याउने गरी आवश्यक काम भइरहेको बताए। उनले सार्वजनिक प्रसारण संस्थाका रुपमा रेडियो नेपाल र नेपाल टेलिभिजन रुपान्तरणको प्रक्रियामा रहेकाले त्यसपछि आउनसक्ने समस्याको समाधान गर्ने गरी ऐनले स्पष्ट पार्नुपर्नेमा जोड दिए।
पेशागत महासङ्घ नेपालका अध्यक्ष पुण्यप्रसाद ढकाल र सार्वजनिक संस्था राष्ट्रिय कर्मचारी सङ्गठनका अध्यक्ष इन्दु आचार्यले श्रमिक कर्मचारीका समस्यालाई सरकारले बेलैमा समाधान गर्न आपसी सहयोग र समन्वय जरुरी भएको बताए।
रेडियो नेपाल कर्मचारी युनियनका अध्यक्ष भरतप्रसाद घिमिरे, रेडियो नेपाल राष्ट्रिय कर्मचारी सङ्गठनका अध्यक्ष राजेश श्रेष्ठ र रेडियो नेपाल कर्मचारी सङ्घका उपाध्यक्ष भीम विश्वकर्माले रेडियो नेपालको स्वायत्तत्ता र आर्थिक सबलतामा सरकारले ध्यान दिनुपर्नेमा जोड दिए।
