काठमाडौं- नबिल बैंक लिमिटेडले नेपाली नयाँ वर्ष २०८३ को अवसर पारेर विगत चार दशकदेखि अनुसरण गर्दै आएको आफ्नो भिजन (परिकल्पना), मिसन (लक्ष्य) र मूल्यमान्यतालाई पुन: परिभाषित गर्दै नयाँ प्रतिबद्धता जाहेर गरेको छ ।
बैंकले यस परिमार्जित उद्देश्यमार्फत भरोसा, उत्थानशीलता र तत्परताप्रतिको आफ्नो प्रतिबद्धतालाई पुनः पुष्टि गरेको जनाएको छ ।
नबिल बैंकले ‘नेपालको सबैभन्दा भरपर्दो र भविष्यका लागि तयार बैंक बन्ने’ आफ्नो नयाँ भिजन सार्वजनिक गरेको छ । यसैगरी, बैंकको नयाँ परिभाषित मिसनमा ‘भविष्यका लागि तयार नेतृत्व निर्माण गर्दै, नवीनताद्वारा सञ्चालित, सुशासन र ESG (वातावरणीय, सामाजिक र सुशासन) उत्तरदायित्वद्वारा निर्देशित रही, ग्राहकलाई पहिलो प्राथमिकता दिने उत्कृष्ट सेवा प्रदान गर्ने विश्वस्तरीय नेपाली बैंक बन्ने’ लक्ष्य राखिएको छ ।
बैंकका प्रमुख कार्यकारी अधिकृत मनोजकुमार ज्ञवालीले बैंकिङ वातावरणमा तीव्र परिवर्तन भइरहेको समयमा यो पुन: परिभाषा आएको बताए । उनले भने, “ग्राहक-केन्द्रित र विश्वस्तरीय नेपाली बैंक बन्ने उद्देश्यका साथ हामीले बैंकको मिसन, लक्ष्य र मूल्यमान्यतालाई पुन: परिभाषित गरेका छौं ।” उनका अनुसार परिमार्जित रूपरेखाले सेवाको उत्कृष्टता, डिजिटल संलग्नता, नेतृत्व विकासमा निरन्तर लगानी र जवाफदेहिताको संस्कृतिमा जोड दिएको छ ।
बैंकले आफ्नो मूल मूल्यमान्यतालाई ‘पाँच टी’ (५टी) – ट्रस्ट (भरोसा), ट्रान्सपरेन्सी (पारदर्शिता), ट्यालेन्ट (प्रतिभा), टेक्नोलोजी (प्रविधि) र ट्रान्सफर्मेसन (रूपान्तरण) मार्फत प्रस्तुत गरेको छ । यी मूल्यहरू पञ्चतत्व दर्शनमा आधारित छन्, जहाँ पृथ्वीले भरोसा, जलले पारदर्शिता, अग्निले प्रतिभा, वायुले प्रविधि र आकाशले परिवर्तनलाई प्रतिनिधित्व गर्दछन् ।
परिवर्तित ग्राहक अपेक्षाहरू, दिगोपनामा बढ्दो ध्यान, र डिजिटल प्रविधि तथा आर्टिफिसियल इन्टेलिजेन्सको बढ्दो भूमिकालाई मध्यनजर गर्दै बैंकले आफूलाई रूपान्तरण गर्नुपर्ने आवश्यकता महसुस गरेको हो । यसै क्रममा बैंकले आफ्नो ट्यागलाइन पनि परिवर्तन गरी ‘टुगेदर अहेड अलवेज’ (Together ahead always) राखेको छ, जसको मुख्य उद्देश्य सबै पुस्ताका लागि गुणस्तरीय बैंकिङ सेवाको आवश्यकतालाई समेट्नु हो ।
नेपाली बैंकिङ क्षेत्रको अग्रणी बैंक नबिल बैंकले हाल देशभर २६८ शाखा र ३१८ एटीएम नेटवर्कमार्फत नवीन र ग्राहकमुखी वित्तीय समाधानहरू प्रदान गर्दै आएको छ ।
